رپوټونه

د طالبانو ویاند ذبیح‌الله مجاهد، د دوشنبې په ورځ په یوه آنلاین غونډه کې ومنله چې د طالبانو د رهبرۍ په کچه فکري اختلافات شته، خو ټینګار یې وکړ چې دا اختلافات د جګړې یا د طالبانو د نظام د ړنګیدو لپاره کوم ګواښ نه دي.

په پاکستان کې مېشت افغان کډوال د یو پرانیستې لیک له لارې د هند له صدراعظم نریندرا مودي څخه غوښتي چې د پاکستان له لوري د دوی د جبري ایستلو د مخنیوي په برخه کې بېړنی مرسته وکړي.

د افغانستان د دولتي کارکوونکو د معاشونو د ورکړې له څلوېښت ورځني ځنډ وروسته، یو شمېر ملکي کارکوونکي د خپل اقتصادي وضعیت په اړه اندېښمن دي. دغو ملکي کارکوونکو طرز پرس ته ویلي، که دا وضعیت دوام وکړي، د خپلو لومړنیو اړتیاوو پوره کول به ورته ناشوني شي، ان د یوې ډوډۍ پیسې پیدا کول به هم ورته ګرانه وي.

د امریکا د ملي استخباراتو د ریاست لپاره د ډونالډ ټرمپ نوماندې، تولسي ګب‌ارد، د خپلې تاییدۍ غونډې ته په وینا کې خبرداری ورکړ چې القاعده او داعش لا هم امریکا لپاره یو جدي ګواښ ګڼل کېږي او پخوانیو امریکايي حکومتونو د دغو ډلو خطر ته لازم پام نه دی کړی.

نړیوالې جنایي محکمې (ICC) د طالبانو د مشر، هبت‌الله آخندزاده، او د دې ډلې د قاضي‌القضات، عبدالحکیم حقاني، د نیولو رسمي غوښتنه کړې ده. د طالبانو مشر او قاضی القضات دواړه د بشر ضد په جنایتونو تورن شوي دي.

د منځني ختیځ وروستي بدلونونه او د ایران د اټومي پروګرام په اړه د زیاتېدونکو اندېښنو په ترڅ کې، اوس داسې ښکاري چې د دیپلوماتیکو حل لارو لپاره هیلې کمرنګه شوې دي. د العربیه د انګلیسي څانګې د راپور له مخې او د لوړو پوړو اروپايي تحلیلګرانو او ډیپلوماتانو په وینا، اوس پر ایران د اسراييل له لوري د د دې هېواد پر اټومي تأسیساتو د مستقیم پوځي اقدام، امکان تر بل هر وخت زیات شوی دی.

ګارډین په یوه نوي راپور کې د هغو زرګونو افغانانو نامعلوم برخلیک څرګند کړی چې د امریکایي ځواکونو تر وتلو وروسته له افغانستان څخه وتلي دي. دغه افغانان چې د امریکا په مرسته ایستل شوي، اوس لږ تر لږه د ۳۶ هېوادونو په کمپونو کې په سختو شرایطو کې ژوند کوي.

په اسلام‌آباد کې د طالبانو سفارت اعلان وکړ چې پاکستان د ۲۰۲۵ کال د جنورۍ له ۱۵مې نېټې څخه نور د افغان کډوالو د په زوره شړلو لړۍ درولې ده. ظاهراً دا پرېکړه د طالبانو د سفارت، د پاکستاني چارواکو او د ملګرو ملتونو د کډوالو عالي کمېشنرۍ تر منځ له سختو خبرو اترو وروسته شوې ده.

د نړیوالو ادارو چوپتیا او د افغان کډوالو د جبري ایستلو پر وړاندې د اغېزمن غبرګون نشتون د افغانستان د بشري حقونو او مدني فعالانو لپاره یوه جدي اندېښنه ګرځېدلې ده. دغو فعالانو نن په اسلام‌اباد کې یوې خبري ناستې ته، د ملګرو ملتونو د کډوالو عالي کمیشنرۍ (UNHCR) او نورو نړیوالو ادارو د لږې پاملرنې له امله نیوکه وکړه او څرګنده یې کړه چې د دې حالت دوام به د یوې پراخې بشري ناورین لامل شي.

اسلام‌آباد، پاکستان – په افغانستان کې د نجونو د زده‌کړو پر مخ د بندیزونو له امله د زیاتېدونکو اندېښنو په ترڅ کې، د اسلامي نړۍ د یووالي سازمان سرمنشي، محمد بن عبدالکریم عیسا، ټینګار وکړ چې په اسلام کې د نجونو د زده‌کړو لپاره هیڅ ډول محدودیت شتون نه لري.