رپوټونه

په کابل کې د ملګرو ملتونو او د اسلامي همکاریو سازمان په ګډه ناسته کې یو ځل بیا ټینګار وشو چې طالبان باید پر ښځو لګول شوي محدودیتونه لرې کړي.د افغانستان لپاره د ملګرو ملتونو د استازولۍ «یوناما» مشرې، روزا اوتونبایوا، په دې ناسته کې خبرداری ورکړ چې د طالبانو محدودیتونه د زده‌کړو، کار او روغتیایي خدماتو ته د ښځو د لاسرسي مخه نیسي او دا به د افغان ټولنې لپاره جدي او اوږدمهاله پایلې ولري.

بریتانوي ورځپاڼې ټیلیګراف په یوه ځانګړي راپور کې لیکلي چې د طالبانو مشر ملا هبت‌الله اخندزاده نور نشي کولای د دې ډلې دننه یووالي وساتي. هغه اختلافات چې مخکې د پردې ترشا روان وو، اوس ښکاره شوي او داسې یوې مرحلې ته رسېدلي چې د طالبانو واکمني له دننه کمزورې کولی شي.

د ملا هبت الله پرضد د طالبانو د بهرنیو چارو وزارت سیاسي مرستیال، عباس ستانکزي تر سختو څرګندونو وروسته، اوس د طالبانو د بهرنیو چارو وزیر، امیرخان متقي هم د هبت الله د منتقدینو په ډله کې ور ګډ شوی او د نوموړي سیاسي تګلاره یې غندلې چې ویل کیږي د هېواد د ملي ګټو په زیان ده.

د آلمان چارواکو پرون (سه‌شنبه، د سلواغې ۲۳مه) اعلان وکړ چې اووه کډوال، چې درې افغانان او څلور سوریایان پکې شامل دي، د نوردراین-وستفالن ایالت څخه بلغاریا ته شړل شوي دي. دا اقدام د دوبلین هوکړه‌لیک پر بنسټ ترسره شوی، چې له مخې یې هغه کډوال چې د اروپايي اتحادیې غړي هېواد ته د لومړي ځل لپاره داخل شوي، باید د هماغه هېواد څخه د پناه غوښتنه وکړي.

د طالبانو د عدليې وزارت د معلوماتو له مخې، یوازې په تېرو درې اوونیو کې ۴۴ تنه، چې شپږ یې ښځې دي، د افغانستان په بېلابېلو ولایتونو کې په عام محضر کې په درو ټکول شوي دي. په همدې موده کې د طالبانو د امر بالمعروف او نهی عن المنکر ځواکونو، ۱۸ نور کسان هم نیولي دي.

چین او پاکستان موافقه کړې چې د افغانستان د ثبات او له نړیوالې ټولنې سره د بېرته ادغام په برخه کې به خپلې همکارۍ پراخې کړي. د پاکستان د بهرنیو چارو وزارت په یوه اعلامیه کې دا خبر تایید کړی دی.

یوې هکري ډلې تازه پر طالبانو سایبري برید کړی او د دې ډلې اړوند د ۲۱ وزارتونو او خپلواکو ادارو محرم اسنادونه یې افشا کړي دي. په افشا شویو اسنادونو کې د طالبانو د مشر ملا هیبت الله یو شمېر مهم احکام هم شامل دي چې تر اوسه له خلکو پټ ساتل شوي وو.

په قامت لوړه د سوریې د موقت ولسمشر احمد شرع مېرمنه لطیفه دروبي، په عام محضر کې له څرګندېدو سره په ټولنیزو پاڼو کې د خلکو پام ځانته اړولی دی. نوموړې د یوه داسې سړي مېرمنه ده چې د القاعدې مخکښ غړی وو، خو اغلې دروبي د خپل خاوند د مذهبي عقایدو خلاف، پرېکړه کړې چې په عام محضر او د رسنیو په حضور کې راڅرګنده شي.