تازه خبرونه

د ایران د بهرنیو چارو وزارت اعلان کړی چې د روسیې د بهرنیو چارو وزیر، سرګئی لاوروف، به په راتلونکو ورځو کې له ایراني چارواکو سره د خبرو لپاره تهران ته سفر وکړي. د دې سفر هدف د سیمه‌ییزو او نړیوالو تحولاتو په اړه خبرې اترې بلل شوي دي.

د سپینې ماڼۍ مرستیاله ویانده آنا کلي، اعلان کړی چې د امریکایي ځواکونو له وتلو وروسته، افغان مېرمنې له سختو محدودیتونو او د طالبانو له تګلارو سخته ځورېدلي دي.

د امریکا د بهرنیو چارو وزیر د افغانستان په اړه تازه څرګندونې کړي او د ترهګریزو ډلو د فعالیتونو د پراخېدو په اړه یې اندېښنه څرګنده کړې. نوموړي د طالبانو د مطلق حاکمیت ادعا هم تر پوښتنې لاندې راوستې ده.

په ټولنیزو رسنیو کې د طالبانو د عدلیې وزیر عبدالحکیم شرعي ته منسوب یو غږيز پیغام خپور شوی چې په دې پیغام کې نوموړی د فساد پراخوالي او اداري مداخلو له کبله له خپلې دندې د استعفا خبره مطرح کوي.

پاکستاني رسنیو راپور ورکړی چې نامعلومو وسله‌والو د بلوچستان په برخان سیمه کې اووه مسافر له یوه بس څخه ښکته کړي او په ډزو وژلي دي. دا برید د سې شنبې په شپه ناوخته د «فبروري۱۸مه» ترسره شوی او ویل کیږي چې ټول قربانیان د پنجاب ایالت اوسېدونکي وو.

د امریکا متحده ایالاتو او روسیې لوړپوړو چارواکو نن، د سه‌شنبې په ورځ د سلواغې۳۰مه، د سعودي عربستان په پلازمینه ریاض کې سره ولیدل، ترڅو په دوه اړخیزو اړیکو او د اوکراین د جګړې د پای ته رسولو لارې چارې و ارزوي.

په کندز کې وسله‌واله نښته؛ طالبان په علی‌آباد ولسوالۍ کې له ناپېژندو وسله‌والو سره نښته کړې. د کندز له علی‌آباد ولسوالۍ څخه د طالب جنګیالیو او ناپېژاندو وسله‌والو ترمنځ د سختو نښتو راپورونه ورکړل شوي دي.

د سوریې د پړځېدلي ولسمشر بشار اسد مېرمنه، اسماء اسد، له اوږدې چوپتیا وروسته په «ایکس» کې یو پیغام خپور کړی، چې پکې په غیرمستقیم ډول د خپل مېړه له ځینو پریکړو سره خپل اختلاف څرګند کړی.

د اسرائیل لومړی وزیر، بنیامین نتانیاهو، د امریکا د بهرنیو چارو وزیر مارکو روبیو سره په یوه ګډه خبري غونډه کې د خپل هېواد پر هغه ژمنتیا ټینګار وکړ چې د امریکا په ملاتړ د ایران لخوا له هر ډول احتمالي ګواښونو پر وړاندې مبارزه کوي.

د ترکیې او پاکستان مشرانو د افغانستان د سولې، ثبات او امنیت پر ارزښت ټینګار کړی دی. د پاکستان د بهرنیو چارو وزارت د اعلامیې له مخې، د ترکیې ولسمشر رجب طیب اردوغان او د پاکستان لومړي وزیر شهباز شریف په افغانستان کې د یوه داسې ټولشموله حکومت د جوړېدو غوښتنه کړې، چې باید د ټولو قومونو او سیاسي ډلو استازیتوب وکړي.