تازه خبرونه

د پاکستان لومړي وزیر شهباز شریف، یو ځل بیا ټینګار وکړ چې د افغانستان ثبات د سیمې امنیت لپاره مهم دی او له طالبانو څخه یې غوښتنه کړې چې له افغانستان څخه د ګاونډیو هېوادونو پر وړاندې د ترهګریزو بریدونو مخه ونیسي.

د امریکا له اوږدو اقتصادي او نظامي فشارونو وروسته، د اوکراين ولسمشر ولوديمير زلنسکي بالاخره اړ شو چې له واشنګتن سره د دې هېواد د نادرو کانونو د استخراج تړون ته غاړه کښېږدي. د «فرانسه» خبري آژانس د يوه اوکرايني چارواکي له قوله راپور ورکړی چې کي‌یف او واشنګټن د دې تړون په اړه توافق ته رسېدلي، او تمه کېږي چې اوکراين به دغه تړون د جمعې په ورځ لاسليک کړي.

د حزب اسلامي مشر ګلبدین حکمتیار د طالبانو تر کنټرول لاندې د افغانستان پر اوسني وضعیت اندیښنه څرګنده کړې او د هېواد راتلونکی یې «تیاره» بللې ده. هغه ویلي چې افغانستان په «سمه لاره» نه ده روان او خلک د خپل راتلونکو ورځو په اړه بې‌خبر او اندیښمن دي.

د آلمان د مسیحي دموکرات ګوند مشر او د دې هېواد نوی صدراعظم، فریدریش مرتس، د امریکا له هغه اقدام سره سخت مخالفت څرګند کړی چې دی یې «د آلمان د ټاکنو په بهیر کې لاسوهنه» بولي. مرتس، چې له خپلې بریا وروسته یې خبرې کولې، اروپایي هېوادونو ته خبرداری ورکړ چې امریکا متحده ایالات نور د اروپا برخلیک ته د پخوا په څېر ارزښت نه ورکوي، نو اروپا باید د خپلواکۍ پر لور ګامونه واخلي.

د مزارشریف د بزکشۍ درېیم پړاو سیالۍ د یما پټرول د چاپندازانو په بریا پای ته ورسېدې. په پایلوبه کې، چې نن (یکشنبه، د کب۵مه) ترسره شوه، د یما پټرول لوبډلې د بدخشان د چاپندازانو پر وړاندې ۸-۰ بریا خپله کړه او د اتلولۍ جام یې خپل کړ.

د امریکا پخواني ولسمشر، دونالد ټرمپ، د جمهوري غوښتونکو په یوې غونډه کې د طالبانو له لوري د امریکايي پوځي تجهیزاتو د نیولو په اړه سخت غبرګون وښود او ویې ویل چې دا موضوع هغه سخت په غوصه کوي.

د ایران د بهرنیو چارو وزارت اعلان کړی چې د روسیې د بهرنیو چارو وزیر، سرګئی لاوروف، به په راتلونکو ورځو کې له ایراني چارواکو سره د خبرو لپاره تهران ته سفر وکړي. د دې سفر هدف د سیمه‌ییزو او نړیوالو تحولاتو په اړه خبرې اترې بلل شوي دي.

د سپینې ماڼۍ مرستیاله ویانده آنا کلي، اعلان کړی چې د امریکایي ځواکونو له وتلو وروسته، افغان مېرمنې له سختو محدودیتونو او د طالبانو له تګلارو سخته ځورېدلي دي.

د امریکا د بهرنیو چارو وزیر د افغانستان په اړه تازه څرګندونې کړي او د ترهګریزو ډلو د فعالیتونو د پراخېدو په اړه یې اندېښنه څرګنده کړې. نوموړي د طالبانو د مطلق حاکمیت ادعا هم تر پوښتنې لاندې راوستې ده.

په ټولنیزو رسنیو کې د طالبانو د عدلیې وزیر عبدالحکیم شرعي ته منسوب یو غږيز پیغام خپور شوی چې په دې پیغام کې نوموړی د فساد پراخوالي او اداري مداخلو له کبله له خپلې دندې د استعفا خبره مطرح کوي.