د مزارشریف د بزکشۍ درېیم پړاو سیالۍ د یما پټرول د چاپندازانو په بریا پای ته ورسېدې. په پایلوبه کې، چې نن (یکشنبه، د کب۵مه) ترسره شوه، د یما پټرول لوبډلې د بدخشان د چاپندازانو پر وړاندې ۸-۰ بریا خپله کړه او د اتلولۍ جام یې خپل کړ.
دا سیالۍ د بلخ ولایت په کوربهتوب د بزکشۍ فدراسیون تر نظارت لاندې ترسره شوې، چې پکې د هېواد له ۹ ولایتونو، ۱۳ لوبډلو ګډون کړی و.
بزکشي، د افغانستان یو له پخوانیو دودیزو سپورتي لوبو څخه ده او دا سیالۍ هم د زرګونو مینوالو لخوا له پراخ هرکلي سره مخ شوه. د چاپندازانو مهارت، نږدې سیالۍ، او د نندارچیانو ګډون، دا ټورنمنټ د هېواد په کچه یو مهم سپورتي ایونټ وګرځاوه.
د بزکشۍ فدراسیون مسوولینو ویلي، چې د دې سیالیو موخه د دودیزو ورزشونو پیاوړتیا، د چاپندازانو ترمنځ روغ رقابت، او د نوو استعدادونو پیدا کول دي. دوی ژمنه کړې، چې راتلونکي ټورنمنټونه به لا ښه مدیریت او اسانتیاوو سره تنظیم او ترسره کړي.
دا په داسې حال کې ده چې طالبانو په افغانستان کې د ښځو پر ضد پراخ محدودیتونه وضع کړي او ښځې نه یوازې ورزش نه شي کولی، بلکه له تعلیم او له هرډول ازادیو څخه بې برخې دي.
