د بریتانیا دیليمیل ورځپاڼې د لوړپوړو سیاسي، نظامي او دیپلوماتیکو سرچینو پر بنسټ راپور ورکړی چې امریکا او اسرائیل د ایران پر ضد د یوه ګډ برید لپاره تیاری نیسي. د دې عملیاتو موخه نه یوازې د ایران د اټومي وسلو پروګرام له منځه وړل ښودل شوي بلکې پراخو بریدونو ته اشاره شوې ده.
په راپور کې د اسرائیلي حکومت د یوه لوړپوړي چارواکي له خولې ویل شوي: «دا موضوع باید ډېر پخوا حل شوې وای. اوس وخت یې رارسېدلی چې یوه حقیقي سره کرښه وکاږو.»
دیلیمیل زیاتوي، مخکې هم د ایران د اټومي پروګرام پر ضد د نظامي اقدام ګواښونه شوي وو، خو اوس داسې مستند شواهد شتون لري چې ښيي امریکا او اسرائیل د لفظي ګواښونو پر ځای عملي او جدي اقدامات ترسره کول غواړي.
ورځپاڼه وړاندې لیکي چې امریکا په سیمه کې خپل نظامي حضور پیاوړی کړی او د یوه لوړپوړي دیپلومات له قوله یې لیکلي: «د اسرائیل له نظره، د ټرمپ د ولسمشرۍ پر مهال دا د ایران پر ضد د اقدام تر ټولو غوره فرصت دی. بله داسې موقع به نه وي.»
دا راپور په داسې حال کې خپور شوی چې له دې وړاندې د اسرائیل «کانال ۱۴» هم د هغه هېواد د چارواکو له قوله د امریکا او اسرائیل له لوري پر ایران د احتمالي برید خبر ورکړی و.
