د افغانستان د فوټبال ملي لوبډلې د ۲۰۲۷ کال د آسیا ملتونو جام مقدماتي سیالۍ له ماتې سره پیل کړ. د ملي لوبډلې لوبغاړي نن (سې شنبه، د وري ۵مه) د میانمار په یانګون ښار کې د کوربه لوبډلې پر وړاندې سیالۍ ته ښکته شول، خو د ۲ – ۱ پایلې سره یې ماتې وخوړه.
یوازینی ګول د افغانستان لپاره امید پوپلزي وواهه، خو دا ګول د ماتې مخنیوی ونشوای کولی. سره له دې، افغان لوبډله لا هم د جبران چانس لري او په راتلونکو سیالیو کې به د پاکستان او سوریې سره مخامخ شي.
خو د افغانستان د فوټبال ملي لوبډلې مینهوال د خپلې لوبډلې له لوبې ناهیلي شوي دي او دا ماته یې د افغانستان د فوټبال د ناسم مدیریت پایله بللې ده.
د فوټبال د فدراسیون د کمزوري مدیریت، د مسلکي لوبغاړو د نه جذب، او د تخنیکي کارپوهانو د نشتوالي له امله، افغان فوټبال په وروستیو کلونو کې له پرلهپسې ماتو سره مخامخ شوی دی.
