د امریکا ولسمشر، ډونالډ ټرمپ، او د ایران مذهبي مشر، علي خامنهای، یو بل ته سخت ګواښونه کړي، چې د سیمې د وضعیت کړکېچن کېدو او د احتمالي نظامي شخړې اندېښنې یې لا زیاتې کړې دي.
د ایران مذهبي مشر، علي خامنهای، نن د دوشنبې په ورځ پخپله اختریزه وینا کې د امریکا د ولسمشر دونالد ټرمپ پر دریځ نیوکه وکړه او وویل: «ګواښ کوي چې شرارت به وکړي؛ البته که شرارت وکړي، خامخا به قوي متقابل ځواب ترلاسه کړي.» هغه دا هم وویل: «په سیمه کې یوازې یو نیابتي ځواک شتون لري، او هغه اسرائیل دی چې د استعماري ځواکونو په استازیتوب جنایتونه ترسره کوي.»
له بلې خوا، د امریکا ولسمشر، ډونالډ ټرمپ، پرون د یکشنبې په ورځ له «ان بي سي نیوز» سره په مرکه کې ایران ته ګواښ وکړ چې ډېر سخت به وځپل شي. هغه وویل: «که توافق ونه کړئ، بمباران به شئ. داسې بمباران چې مثال یې چا نه وي لیدلی.» ټرمپ همداراز وویل چې ایران به د «تعرفو د ثانوي بندیزونو» سره هم مخ شي».
دا څرګندونې په داسې حال کې کیږي چې امریکا او ایران پر یو بل د برید لپاره وار له مخه نظامي تابیاوې نیولي دي. اطلاعات په ډاګه کوي چې امریکا خپل «بی۲ بم غورځوونکي » جنګي الوتکې ایران سره نږدې په سیمه کې ځای پرځای کړي دي او بل خوا یوې بریتانیايي رسنۍ پرون د یک شنبې په ورځ د یو ایراني چارواکي له قوله ولیکل، چې که امریکا پر دغه هېواد برید وکړي؛ نو ایران به په ځواب کې د هند په سمندر کې د متحده ایالاتو ستراتژیک هوايي ډګر «دیگو گارسیا» په نښه کړي.
باور دادی چې د واشنګټن او تهران دا متضاد دریځونه د پوځي شخړې احتمال تر بل هر وخت ډېر کړی دی.
