پاکستان د مارچ په میاشت کې د تېرې یوې لسیزې تر ټولو زیات بریدونه تجربه کړي دي. د پاکستان د امنیت او شخړو د مطالعاتو انستیتوت په یوه راپور کې ویلي، چې په دغه یوه میاشت کې لږ تر لږه ۸۴ بریدونه ترسره شوي او له کبله یې ۲۲۸ کسان وژل شوي او ۲۵۸ نور ټپیان دي.
په راپور کې، د وژل شویو کسانو له ډلې ۷۳ کسان امنیتي سرتیري، ۶۷ کسان ملکي وګړي او ۸۸ نور وسله والې ډلې ښودل شوي دي. دغه راپور وايي چې د مارچ میاشت په پاکستان کې د تېرو لسو کلونو په پرتله تر ټولو زیاتو کسانو ته یې مرګ ژوبله اړولې ده.
د یاد بنسټ په راپور کې همداراز ویل شوي، چې د مارچ په میاشت کې پنجاب او سند ایالتونه هم د وسله والو د فعالیتونو د زیاتوالي شاهدان وو.
تر دې وړاندې د پاکستان حکومت تل طالبان تورن کړي چې وسله والو ډلو ته په افغانستان کې پناه ورکوي، خو د طالبانو چارواکو دغه ادعاوې رد کړي او ټینګار یې کړی چې د افغانستان خاوره د هیڅ هیواد پر ضد نه کارول کېږي.
