د ۲۰۲۵ کال د نړۍ میلیاردران: د شتمنو کسانو په تاریخ کې نوې ریکارډ

حامیه نادري

طرز پرس

16 حمل 1404

WhatsApp Image 2025-04-03 at 07.45.50_da7db61e.jpg

د فوربس اقتصادي مجلې په خپل تازه راپور کې ویلي چې د ۲۴۷ نویو میلیاردرانو له زیاتېدو سره، اوس د هغو کسانو شمېر چې شتمني‌یې له یوه میلیارده ډالرو زیاته ده، ۳,۰۲۸ تنو ته رسېدلی دی. دا راپور چې د ۲۰۲۵ کال د مارچ میاشتې د نړیوالو مالي بازارونو پر بنسټ چمتو شوی، د نړۍ د ټولو میلیاردرانو شتمني ۱۶.۱ تریلیون ډالر اټکل کړې ده.

ایلان ماسک لا هم د نړۍ تر ټولو شتمن کس

د ټسلا، ایکس «پخوانی ټویټر»، سپېس‌ ایکس، ایکس‌ ای‌ آی او نورالینک مالک ایلان ماسک، له ۳۴۲ میلیارده ډالرو شتمنۍ سره لا هم د نړۍ تر ټولو شتمن کس پاتې شوی دی.
په زړه‌پورې دا ده چې مارک زاکربرګ، د فیسبوک مالک، له ۲۱۶ میلیارده ډالرو شتمنۍ سره دویم ځای لري، خو د ماسک شتمني تر ده دوه چنده زیاته ده. جېف بیزوس، د امازون بنسټ‌ ایښودونکی، د ۲۱۵ میلیارده ډالرو شتمنۍ له امله دریم مقام لري.

د نړۍ تر ټولو شتمنه ښځه څوک ده؟

آلیس والتون، چې د والمارټ د شرکت مشره ده، له ۱۰۱ میلیارده ډالرو شتمنۍ سره د ۲۰۲۵ کال تر ټولو شتمنه ښځه بلل شوې ده.

سیاسي میلیاردران

د امریکا ولسمشر، ډونالډ ټرمپ، د ۵.۱ میلیارده ډالرو شتمنۍ له امله د دې لیست په ۷۰۰م ځای کې راغلی دی.

کوم هېوادونه تر ټولو ډېر میلیاردران لري؟

د فوربس د راپور له مخې:

  • امریکا: ۹۰۲ میلیاردران لري (په لومړي مقام کې).

  • چین: ۵۱۶ میلیاردران لري (دویم مقام).

  • هند: ۲۰۵ میلیاردران لري (درېیم مقام).

د میلیاردرانو شمېر کې ستره وده

فوربس مجله له ۱۹۸۷ کاله د میلیاردرانو لیست خپروي.

  • په لومړي لیست کې یواځې ۱۴۰ میلیاردران وو.

  • شل کاله وروسته دا شمېر ۱,۰۰۰ ته ورسېد.

  • په ۲۰۱۷ کال کې دا شمېر له ۲,۰۰۰ واوښت.

  • او سږکال، په ۲۰۲۵ کې، دا لومړی ځل دی چې د میلیاردرانو شمېر له ۳,۰۰۰ زیات شوی دی.

د میلیاردرانو شمېر کې چټک زیاتوالی، په ځانګړي ډول په امریکا، چین او هند کې، د نړیوال اقتصاد بدلونونه ښيي. ایلان ماسک لا هم د شتمنو په سر کې دی، او نوې څېرې هم دې لیست ته ور اضافه شوې دي، چې دا د معاصرې نړۍ د شتمنۍ خوځښت او پراخېدو ښکاره نښه ده.