د امریکا له لوري پر ایران د احتمالي برید د راپورونو له خپرېدو وروسته، د ایران ولسمشر مسعود پزشکيان د سعودي عربستان له ولیعهد محمد بن سلمان سره په ټلیفوني خبرو کې ویلي چې ایران جګړې ته هیڅ علاقه نه لري.
په هغو ګډو اعلامیو کې چې د سعودي عربستان او ایران دولتونو له لوري خپرې شوي، مسعود پزشکيان ټینګار کړی چې ایران به له اټومي انرژۍ څخه پوځي استفاده ونه کړي او د نړیوالو څارندیزو بنسټونو سره به همغږي پاتې شي.
پزشکيان په دې خبرو کې په څرګند ډول ویلي چې د ایران امنیتي دکترینو غیرسولهییز اټومي فعالیت ته هېڅ ځای نه دی ورکړی. نوموړي همداراز ټینګار کړی چې تهران د نړیوالو څارونکو ادارو سره همکارۍ ته ژمن دی او د کړکېچ او شخړې مخنیوی غواړي.
دا خبرې داسې مهال شوې چې د ایران او امریکا اړیکې د ایران د اټومي برنامې د نه روڼتیا له کبله تر بل هر وخت زیات ترینګلي شوي دي. سعودي عربستان د امریکا لپاره د یو ښه منځګړي او ښه واسطه په توګه یادېږي.
