افغانستان

په خیبرپښتونخوا کې د وسله والو له مرګوني برید چې په ترڅ کې یې ۱۸ کسان ووژل شول؛ اوس د پاکستان د پوځ مشر جنرال عاصم منیر وايي چې وسله والو په افغانستان کې له بهرنیانو څخه پاتې شويو وسلوو څخه ګټه اخېسته.

په داسې حال کې چې له افغانستان څخه باخبرو سرچینو طرز پرس ته ويلي چې د طالبانو د کورنیو چارو وزیر سراج الدین حقاني لاهم په دوبۍ کې اوسيږي او افغانستان ته یې د بیا راستنېدو په اړه راپورونه ناسم دي؛ خو د طالبانو ویاند ذبیح الله مجاهد د افغانستان کورنيو رسنيو ته ویلي چې حقاني افغانستان ته راستون شوی او اوسمهال په «استراحت» کې دی.

د آلمان د بهرنیو چارو وزارت د طالبانو پر سیاستونو سخت انتقاد کړی او ویلي یې دي چې په افغانستان کې د ښځو پراخ ځپل دا هېواد د ښځو او نجونو لپاره په یو «ټولنیز زندان» بدل کړی دی.

په ټولنیزو رسنیو کې خپرې شوې ویډیوګانې او انځورونه ښيي چې تورخم تیره شپه هم د طالبانو او پاکستاني سرتېرو ترمنځ د سختو نښتو شاهد و.

د ملګرو ملتونو د بشري حقونو عالي کمېسار، ولکر ترک، د افغانستان د ښځو او نجونو د وضعیت له امله خپله جدي اندېښنه څرګنده کړې او اوسنی نظام یې د «جنسیتي اپارتاید» په تطبیقولو تورن کړی.

په داسې حال کې چې طالبانو په تېرو درېو کلونو کې د حکومتولۍ هېڅ یو شرايط نه دي پوره کړي او د بشري حقونو او د افغانانو د بنسټيزو آزاديو په زغملو کې ناکام شوي دي، خو د دغې ډلې ویاند ذبیح الله مجاهد، ادعا کړې چې اروپايي هېوادونه غواړي له طالبانو سره خپلې ډيپلوماټیکې اړيکې پراخه کړي.

دوه باوري سرچینو خبر ورکړی چې طالبان نن د تورخم دروازې د بیا پرانیستلو په موخه له پاکستاني لوري سره مذاکرات کوي. تورخم، چې د افغانستان او پاکستان ترمنځ یو له مهمو سوداګریزو او ترانزیتي لارو څخه ګڼل کېږي، دا اوومه ورځ ده چې د پاکستان له خوا تړل شوې ده.

د ملګرو ملتونو د بشري حقونو شورا ځانګړی راپور ورکوونکی، ریچارد بنت، د افغانستان د بشري وضعیت په اړه د نړیوالې ټولنې د لا زیات پام غوښتنه کړې ده. نوموړي ټینګار کړی چې د افغانستان خلک د نړیوال ملاتړ مستحق دي او باید د نړیوالو بحرانونو تر سیوري لاندې هیر نه شي.

یوه پاکستانۍ رسنۍ، چې د دې هېواد له پوځ سره نږدې بلل کېږي، راپور ورکړی چې له طالبانو سره د اړیکو د بیا پیلولو لپاره د اسلام‌اباد دیپلوماټیکې هڅې له ستونزو سره مخ دي.