د ملګرو ملتونو د بشري حقونو عالي کمېسار، ولکر ترک، د افغانستان د ښځو او نجونو د وضعیت له امله خپله جدي اندېښنه څرګنده کړې او اوسنی نظام یې د «جنسیتي اپارتاید» په تطبیقولو تورن کړی.
نوموړي په یوه بیان کې ویلي چې د ښځو او نجونو پر وړاندې ظالمانه تګلارې دوی عملاً د خپلو کورونو «مجازي بندیان» ګرځولي او له اساسي حقونو یې بې برخې کړي دي.
ترک ټینګار کړی چې د زدهکړې، کار، ازادۍ او ټولنیز مشارکت پر وړاندې پراخ محدودیتونه د دې لامل شوي چې افغانې ښځې له عادي ژوند څخه بې برخې شي او په ټوله کې له ټولنې وشړل شي. د هغه په وینا، دا کړنې د بشري حقونو او نړیوالو قوانینو ښکاره نقض دی، او نړیواله ټولنه باید د دې ظلم په وړاندې چوپ پاتې نشي.
د ملګرو ملتونو د بشري حقونو عالي کمېسار له غړو هېوادونو او نړیوالو بنسټونو غوښتنه کړې چې د دې وضعیت د پای ته رسولو لپاره پر طالبانو سیاسي او اقتصادي فشارونه زیات کړي او له افغانو ښځو او نجونو څخه خپل ملاتړ پراخ کړي.
نوموړي همدارنګه خبرداری ورکړی چې د دې حالت دوام به د افغانستان د راتلونکو نسلونو لپاره ناوړه او نه جبرانېدونکې پایلې ولري.
