په ټولنیزو رسنیو کې خپرې شوې ویډیوګانې او انځورونه ښيي چې تورخم تیره شپه هم د طالبانو او پاکستاني سرتېرو ترمنځ د سختو نښتو شاهد و.
یوه سرچینه طرز پرس ته وایي چې دغه جګړه د شپې له ۱۲ بجو پیل شوه او تر سهاره یې دوام درلود. بل پلو ځینې انځورونه ښيي چې د طالبانو سرتېري د تورخم صفري ټکي ته رسېدلي او هلته یې انځورونه اخیستي دي.
په همدې حال کې، دواړه لوري ادعا کوي چې یو بل ته یې مرګژوبله اړولې، خو تر دې دمه په دې اړه هیڅ رسمي راپور نه دی خپور شوی.
دا په داسې حال کې ده چې د سرچینې په وینا، طالبانو او پاکستاني لوري د روانې اونۍ د یکشنبې په ورځ د تورخم دروازې د خلاصولو په اړه خبرې پیل کړي وو، خو د جګړې دوام له کبله دغه مذاکرات بېنتیجې پای ته رسېدلي دي.
