افغانستان

د امریکا د بهرنیو چارو وزارت اعلان کړی چې واشنګټن په افغانستان کې له جګړې او وسله‌والې نښتې ملاتړ نه کوي. طرز پرس: د امریکا د بهرنیو چارو وزارت ویاند متیو میلر فاکس نیوز ته ویلي چې واشنګټن نه غواړي افغانستان بیا جګړې ته لاړ شي.

د امر بالمعروف او نهی عن المنکر قانون پر وړاندې د غبرګونونو په دوام کې، د ازادۍ پر لور د ښځو غورځنګ له نړیوالې ټولنې غوښتنه وکړه چې طالبان دې منزوي کړي او له دې ډلې سره دې له هر ډول تعامل څخه ډډه وکړي.

طالبان په لومړي ځل د دوی په بندخونو کې د ښځو بندیانو په اړه جزییات خپاره کړل او د دغه راپور پر بنسټ، لږ تر لږه زر ۱۰۰۰ تنه ښځې د طالبانو په بندخونو کې زندانیانې دي.

تر هغو راپورونو وروسته چې ګواکې طالبان له روسیې څخه د هوايي دفاع سیسټم په پېرولو کې علاقه لري، د طالبانو دفاع وزارت وايي چې دا راپورونه ناسم دي او تر اوسه یې له روسي چارواکو سره په دې اړه هېڅ ډول خبرې نه دي کړي.

برلین کې د افغانستان له سفارت څخه یوې سرچینې طرز پرس ته ومنله چې دوی ته د افغانستان د ډپلماتیکو مرکزونو د تخلیې امر ورکړل شوی دی. طرز پرس: دې دپلماتیکې سرچینې وویل چې مخکې هم ورته له برلین څخه ورته خبرداری ورکړل شوی و، خو په هغو خبرداریو کې د «تخلیې یا تړلو» موضوع روښانه نه وه.

برلین اعلان کړی چې کابل ته د یو شمېر افغان وګړو استول، له طالبانو سره د اړیکو د عادي کولو په معنی نه دي او دا اقدام د قطر له حکومت سره په همغږۍ ترسره شوی دی.

د امریکا د بهرنيو چارو پخوانۍ وزیره هيلاري کلنټن، د ښځو پر وړاندې د طالبانو له اعمال شویو محدودیتونو څخه په کلکه نیوکه کړې او ويلي یې دي چې د طالب چارواکو لوڼې بهر کې زده کړې کوي؛ خو افغانستان کې نجونې محرومې دي.

طالبان وايي چې روسیه د نظامي تجهیزاتو او ټکنالوژۍ له پلوه د نړۍ ترټولو ځواکمن هېواد دی او دوی به له مسکو څخه د هوايي دفاع سیستم غوښتنه وکړي.

د ازبیکستان لومړي وزیر ویلي چې د دې هېواد په بهرني سیاست کې افغانستان مهم ځای لري او تاشکند چمتو دی چې منځنۍ آسیا هېوادونو ته د افغانستان د تازه مېوو د صادرولو زمینه له خپلې خاورې څخه برابره کړي. 

له افغان خاورې څخه پاکستان ته د تحریک طالبان پاکستان «ټي‌ټي‌پي» د بريدونو په اړه د پاکستاني چارواکو د ادعاوو په دوام کې، دا ځل د د دغه هېواد د کورنیو چارو وزیر ویلي چې پاکستان د «تروریستانو» له بریدونو څخه ډېر اغېزمن شوی دی.