تازه خبرونه

پاکستانۍ ورځپاڼې ډان په یوه راپور کې ویلي چې ۲۰۲۴ کال د وسله‌والو بریدونو د زیاتوالي له امله، د پاکستان د امنیتي ځواکونو لپاره په تېرو لسو کلونو کې تر ټولو خونړی کال و.

د ملګرو ملتونو د بشري حقونو عالي کمېشنر فولکر ترک، له طالبانو غوښتنه کړې چې د افغانو ښځو پر وړاندې ټول تبعیضي فرمانونه لغوه کړي. هغه د طالبانو وروستۍ اخطار، چې په هغه کې د ښځو د ګمارنې په صورت کې د غیر دولتي سازمانونو د جوازونو د لغوه کېدو ګواښ شوی، «بشپړ تېروتنه» بللې او د پایلو په اړه یې خبرداری ورکړی.

د طالبانو د کورنیو چارو وزیر سراج الدین حقاني د پاکستان وروستي اقدامات وغندل او دا یې د ټولو نړیوالو اصولو خلاف وبلل. نوموړي وویل، پاکستان پر افغانستان د برید پرېکړه داسې مهال کړې چې طالبان له ۲۰۲۱ کال راهیسې په پرله‌پسې ډول هڅه کوي افغان خاوره د هیڅ بل هېواد پر ضد ونه کارول شي.

روسیې ویلي چې مسکو د افغانستان او پاکستان ترمنځ له وروستيو نښتو اندېښنه لري او له دواړو خواوو غواړي چې خپل اختلافات د خبرو له لارې حل کړي. د روسیې د بهرنیو چارو وزارت ویاندې ماریا زاخارووا ویلي: «په دې سیمه کې شخړې نه یوازې نظامیان، بلکې ملکي وګړي هم قرباني کوي.»

په خوست او پکتیکا ولایتونو کې د طالبانو او پاکستاني پوځيانو ترمنځ د خونړيو نښتو له کبله دواړه لوریو ته درنه تلفات اوښتي دي. یو شمېر سرچینې وايي چې په دې نښتو کې تر دې دمه د پاکستان ۳۸ پوځيان او د طالبانو پنځه غړي وژل شوي دي.

د پاکستان لومړي وزیر شهباز شریف ویلي، په افغانستان کې د تحریک طالبان پاکستان (ټي ټي پي) ازاد فعالیت، اسلام‌آباد لپاره د منلو وړ نه دی او له طالبانو یې غوښتنه کړې چې دغې ډلې پر وړاندې یو پرېکنده دريځ خپل کړي.

یو شمېر رسنیزو بنسټونو د طالبانو هغه هڅې په کلکه غندلي چې غواړي ملي تلویزیون په رادیویي ستېشن بدل کړي. دغو بنسټیز د طالبانو دا اقدام د بیان د آزادۍ د ځپلو او په هېواد کې د کلتوري تنوع د له منځه وړلو لپاره د یوې تنظیم شوې پلان برخه بللې ده.

د پاکستان دوه پولیس افسران د سند ایالت په یوه رستورانت کې وژل شوي دي. پاکستاني چارواکي ویلي، یاد افسران د خوراک په حال کې وو چې بریدګرو لخوا وژل شوي دي.

د افغانستان د پخواني ولسمشر محمد اشرف غني لومړي مرستیال، امرالله صالح، د پاکستان د هوايي بریدونو په غبرګون کې لیکلي چې طالبانو د «امارت او جمهوریت» تر نوم لاندې د خلکو یووالی مات او له منځه وړی دی.

د پاکستان جنګي الوتکو د سه‌شنبې په شپه د پکتيکا پر برمل ولسوالۍ هوايي بريدونه وکړل او دا بریدونه د طالبانو په ګډون د سیمه ييزو لوبغاړو پراخ غبرګونونه را پارولي دي. د طالبانو دفاع وزارت دغه بريد د افغانستان د ملي واکمنۍ ښکاره سرغړونه ګڼلې او خبرداری يې ورکړی چې "دا عمل به بې ځوابه پاتې نه‌شي."