د طالبانو ویاند، ذبیح الله مجاهد، ویلي چې دې ډلې د خپلو ځانمرګو بریدګرو کورنیو څخه د ملاتړ لپاره، ۱۲ میلیارده افغانۍ ځانګړې کړې دي. نوموړي دا څرګندونې د طالبانو تر کنټرول لاندې ملي ټلویزیون سره په مرکه کې کړې، چې د وري ۱۲مه د اېکس په پاڼه خپره شوې ده.
مجاهد ویلي چې دغه اندازه پیسې د درېیو وزارتونو د بودجې معادل دي او د طالبانو د شهیدانو او معلولینو چارو وزارت له لارې به د ځانمرګو بریدګرو د کورنیو ملاتړ ته ځانګړې شي.
د یادونې وړ ده چې په تېرو شلو کلونو کې ډېر افغانان د طالبانو په ځانمرګو خونړيو بریدونو کې خپل ژوند له لاسه ورکړی؛ خو اوس دغه قربانیان د طالبانو په ملاتړيز پروګرام کې شامل نه دي.
د مجاهد په وینا، دا پیسې یوازې د هغو طالب ځانمرګو کورنیو ته ورکول کیږي چې د دوی اولادونو په تېرو شلو کلونو کې په افغانستان کې ځانمرګي بریدونه کړي دي.
