د افغانستان د جمهوري دولت وروستی ولسمشر محمد اشرف غني په خپل اختریز پیغام کې طالبانو ته په غیرمستقیمه توګه اشاره کړې او ویلي چې د افغانستان اصلي ستونزه د مشروعیت مسئله ده او طالبان باید د بدلون لپاره سختې پرېکړې ته تیار شي.
اشرف غني، چې د ۲۰۲۱ کال د اګست په ۱۵مه کابل ته د طالبانو له راتګ څو ساعته مخکې له افغانستانه وتلی، په خپل پیغام کې د دغې ډلې نوم نه دی یاد کړی، خو د طالبانو واکمني ته یې په اشارې ویلي چې افغانستان د ټولو افغانانو ګډ کور دی او د هېواد راتلونکي لپاره اړتیا ده چې ګډې پرېکړې وشي.
غني: راتلونکې لس کلونه به سخت وي
محمد اشرف غني په نړیواله کچه، راتلونکو ۵ تر ۱۰ کلونو پورې د سختو شرایطو وړاندوینه کړې ده او له طالبانو یې غوښتي چې د بهرنیو مرستو تمه ونهلري، بلکې د نوموړي په وینا، د هېواد دننه شته بشري او اقتصادي پانګې ته کار ووايي.
نوموړي ویلي: «څوک چې د زعامت دعوا لري، باید د خلکو پر وړاندې خپل مسؤولیت ادا کړي، بیتالمال شفافیت ته اړتیا لري، او جګړه او نړیوال سیاسي معادلات د بدلون په حال کې دي.»
د افغان کډوالو په اړه اندېښنه
پخواني ولسمشر د افغان کډوالو پر وضعیت هم تبصره کړې او ویلي یې دي چې اوس د دواړو ګاونډیو هېوادونو په ګډون، امریکا او اروپا کې هم افغان کډوالو ته د منلو لپاره ځای نشته. نوموړي زیاته کړې: «ګاونډي هېوادونه، چې مخکې یې زموږ د کډوالو له شتون څخه ګټه اخیسته، اوس ښکاره وايي چې افغانان وباسي. اروپا او امریکا هم ورته ځای نه لري، نو دوی به چېرې ځي؟ د دوی ژوند به څنګه خوندي وي؟»
افغانستان باید نړیوال حیثیت ومومي
محمد اشرف غني د خپل اختریز پیغام په پای کې ټینګار کړی چې افغانستان باید په ۲۱مه پېړۍ کې خپل ملي حیثیت، پاسپورټ او نړیوال اعتبار بېرته ترلاسه کړي. نوموړي ویلي، د هېواد راتلونکی د ټولو افغانانو ګډ مسؤولیت دی او له یوه ټولشموله سیاسي حل پرته، افغانستان له نړیوال انزوا نه شي وتلی.
