له کندز ولایت څخه سیمه یيزې سرچینې وايي چې یو ځوان سوداګر، حاجي ستار، له ۱۵ ورځو راهیسې ورک دی او د هغه په اړه هیڅ معلومات نشته.
طرز پرس ته د رسېدلیو معلوماتو پر بنسټ، حاجي ستار د امامصاحب ولسوالۍ اوسېدونکی و چې په باسوس ښارګوټي کې یې د غنمو تجارت کاوه. هغه د دې ولایت د یوه پیژندل شوي سوداګر کورنۍ غړی دی، چې ورور او ماما یې هم په سوداګریزو چارو بوخت دي.
د حاجي ستار یوه نږدې کس، له طرز پرس سره په خبرو کې د نوموړي د ترې تم کېدو پخلی کړی او ویلي یې دي چې ښاغلی ستار ۱۵ ورځې مخکې جلالاباد ته په سفر تللی و ترڅو ۱۸ لکه افغانۍ چې له یو شخص سره یې درلودې، ترلاسه کړي. هغه د سپین رنګه خلیجي موټر په وسیله سفر وکړ، خو له هغې وروسته هیڅ خبر نه دی ترلاسه شوی.
د دې سرچینې په وینا، د حاجي ستار په بانکي حساب کې، ۸ میلیونه افغانۍ نقدې پیسې موجودې وې. د دې ځوان سوداګر کورنۍ په جدي توګه اندېښمنه ده او له ځايي طالب چارواکو څخه غواړي چې د هغه د موندلو لپاره اقدامات وکړي.
طالبانو تر اوسه په دې اړه څه نه دي ویلي.
