د افغانستان د ملي امنیت پخواني رئیس، رحمتالله نبیل، په خپلو تازه څرګندونو کې، طالبان «د اسلام او بشریت پر تندي د ننگ داغ» بللي او ویلي یې دي چې دا ډله نه یوازې له اسلامي اصولو پردي دي، بلکې د بشري ارزښتونو پر وړاندې هم یو جدي ګواښ دی.
نبیل دغه څرګندونې د دوشنبې په ورځ، د مارچ ۱۷ مه، وروسته له هغې وکړې چې یوه زندانۍ مېرمن له یو شمېر رسنیو سره په خبرو کې ادعا وکړه چې طالبانو ورسره د بند پر مهال ناوړه چلند کړی او جنسي ځورونه یې کړې ده.
نبیل پر ایکس (پخواني ټویټر) لیکلي چې طالبان د خپلو سیاستونو له لارې د دین یو قهرجنه انځور وړاندې کوي. هغه لیکلي: «طالبان نه یوازې له اسلام، بلکې په لومړنیو انساني اصولو هم بوی نه وړي. هغوی د ښځو پر ضد له تاوتریخوالي، تبعیض او ظلم څخه کار اخلي او د دین تحریف شوی انځور وړاندې کوي.»
د افغانستان د ملي امنیت پخواني رئیس همداراز زیاته کړې چې طالبان د ښځو د حقونو محدودول، د فردي آزادۍ ځپل او له تاوتریخوالي کار اخیستل د خپل د حکومت بنسټیز اصول ګرځولی دی. د هغه په وینا، دا کړنې نه یوازې د اسلامي ارزښتونو پر خلاف دي، بلکې بشري اصول هم تر پښو لاندې کوي.
نبیل ټینګار کړی: «طالبان نه د اسلام مدافعین دي، نه د شریعت ساتونکي، او نه د افغانستان د خلکو استازي؛ بلکې دوی د جهالت، ظلم او استبداد وارثان دي، چې د دین په نوم یې آزادي او انساني کرامت تر پښو لاندې کړی دی.»
نبیل دا هم ویلي چې د طالبانو واکمني د دې لامل شوې چې افغانستان له نړیوال انزوا سره مخ شي او افغانان تر بل هر وخت ډېر له خپلو اساسي حقونو او آزادۍ څخه بېبرخې شي.
دا څرګندونې داسې مهال کېږي چې طالبان بیا خپل ځان اسلامي حکومت په توګه معرفي کوي او ادعا لري چې تګلاره یې د «اسلامي شریعت» پر اساس تنظیم شوي دي. خو بل پلو د طالبانو حکومتولۍ لا هم د نړیوالو سازمانونو، افغان سیاستوالو او عامو خلکو له خوا له شدیدو غبرګونونو سره مخ ده.
