په خیبر پښتونخوا ایالت کې د یوې چاودنې له کبله، نن شنبه، د کب ۲۵مه، د پاکستان جنجالي عالم مفتي منیر شاکر او څلور نور کسان ټپیان شول. دا چاودنه هغه مهال وشوه چې مفتي شاکر جومات ته روان و.
ځايي سرچینې وايي، چاودنه د سړک غاړې ماین له کبله رامنځته شوې وه، چې د مفتي شاکر د تېرېدو په سیمه کې ځای پر ځای شوی و. عیني شاهدان وايي، د چاودنې شدت خلکو ته ویره پیدا کړه، او امنیتي ځواکونه سمدستي د پېښې ځای ته ورسېدل.
مفتي منیر شاکر د پاکستان له جنجالي دیني عالمانو څخه ګڼل کېږي، چې د خپلو تندو څرګندونو او افراطي نظریاتو له امله په رسنیو کې وخت ناوخت د خلکو پام ځانته اړولی دی.
نوموړي پخوا هم د دولت او نورو مذهبي ډلو پر وړاندې اختلافونه رامنځته کړي وو او آن ځینې څرګندونې یې سیمهییزې شخړې پارولې دي. دغه پاکستاني عالم د طالبانو د ځینو پالیسیو پر ضد هم د نیوکو له امله شهرت لري.
