د پاکستان د پوځ ویاند، احمد شریف چودري او د بلوچستان وزیر سرفراز بوګټي، نن (جمعه، د کب ۲۴مه) په یوه ګډه خبري ناسته کې اعلان وکړ چې د بلوچستان په وروستي برید کې د هند او افغانستان له لوري تأمین شوي وسلې کارول شوي دي.
ښاغلي چودري، هند د بلوچستان د بریدونو اصلي ملاتړکوونکی وباله او ادعا یې وکړه چې هندي رسنیو د جعلي ویدیوګانو او مصنوعي هوښ په وسیله هڅه کړې چې له دې پېښې سره خپل تړاو څرګنده کړي.
نوموړي همداراز ادعا وکړه چې د هند د څېړنې او تحلیل شبکه او د افغانستان امنیتي ادارې د دغو بریدونو په طرحه کولو او عملي کولو کې لاس درلود. سرفراز بوګټي هم، د دې بریدونو له غندلو سره وویل چې دا د پاکستان پر وړاندې د یوې بهرنۍ دسیسې برخه ده.
د جعفر اکسپرس پر اورګاډي برید، چې تېره سهشنبه وشو، د بلوچستان د آزادۍ غورځنګ له خوا ترسره شو. دا اورګاډی چې ۴۴۰ مسافرین یې پېښور ته لېږدول، لومړی د یو بم پر مټ و درول شوه او بریدګرو بیا ټول سپرلي یرغمل کړل.
د پاکستان د پوځ د راپور له مخې، امنیتي ځواکونو په یوه دوه ورځني عملیات کې ۳۳ بریدګر له منځه وړي، او ۳۵۴ پاتې مسافرین یې خوندي ژغورلي دي. د پوځ ویاند وویل چې بریدګر قصداً داسې لرې پراته سیمه هدف کوي، چې مخابراتي اړیکې پرې کړي او امنیتي ځواکونو ته عملیات سخت او پېچلي کړي.
