دمشق – د سوریې ولسمشر احمد الشرع د پخواني رژیم پاتې شونو ته په خطاب کې ویلي چې په سوریه کې د واک او خلکو ترمنځ هیڅ توپیر نشته او هغوی باید ژر تر ژره خپلې وسلې وسپاري، مخکې له دې چې ناوخته شي.
الشرع ټینګار وکړ: «موږ د آزادۍ په جګړه کې ستاسو د ژوند ساتنې ته ژمن وو، خو ستاسو کړنې د تعجب وړ نه وې. تاسو نابخښونکې تېروتنه کړې، او اوس باید پرته له ځنډ وسلې تسلیم کړئ.»
نوموړي د امنیتي ځواکونو او پوځ رول ته په اشارې زیاته کړه: «د پخواني رژیم پاتې شوني هڅه کوي له هرې اشتباه نه ناوړه ګټه پورته کړي، خو موږ به هغوی تعقیب کړو او د عدالت منګولو ته به یې وسپارو.»
ولسمشر الشرع همداراز د ملي یووالي پر ارزښت ټینګار وکړ او وویل: «سوریه د ټولو لپاره ده، او دلته هیڅوک د ولس پر سر حاکم نه دی. که د سوریې یوه برخه زیانمنه شي، ټول هېواد به د هغې ملاتړ ته راودانګي. موږ د هېواد د مصلحت غوښتونکي یو، خو ستاسو د وینې تویولو ته اړتیا نه لرو.»
دا څرګندونې وروسته له هغه کېږي چې د بشار اسد د رژیم پاتې شونو د لاذیقه په سیمه کې یوه ناکامه کودتا ترسره کړه. احمد الشرع، د سوریې د انتقالي حکومت ولسمشر، هڅه کوي د هېواد ثبات او یووالی وساتي.
