د افغانستان کرکټ ملي لوبډلې د کرکټ نړیوالې شورا (ICC) چمپیونز ټرافي سیالیو کې خپله لومړنۍ تاریخي بریا ثبت کړه. افغان لوبغاړو د انګلستان په وړاندې یوه زړهراښکونکې لوبه ترسره کړه او سیاله لوبډله یې د ۸ منډو په توپیر مات کړه.
په دې سیالۍ کې د افغانستان تکړه پیلیز توپوهونکي ابراهیم ځدراڼ خپله ځانګړې او غوره سلیزه ووهله. نوموړي ۱۷۷ منډې جوړې کړې او د انګلستان پر وړاندې د نننۍ لوبې غوره لوبغاړی وټاکل شو.
همداراز، عظمتالله عمرزي د انګلستان پر وړاندې غوره لوبه وکړه او د افغان کرکټ په دې تاریخي بریا کې یې مهم رول ولوباوه. نوموړي ۳۱ توپونو کې ۴۱ منډې جوړې کړې او بیا یې په خورا مهم وخت کې بهترینه توپ اچونه وکړه. عظمتالله عمرزي د لومړي ځل لپاره په یو ورځنیو نړیوالو سیالیو کې ۵ ویکټې ترلاسه کړې او افغان لوبډله یې سترې بریا ته ورسوله.
د دې تاریخي بریا له امله، د افغانستان کرکټ مینهوال په ټول هېواد او بهر کې خوښي څرګندوي، او د ملي لوبډلې ستاینه کوي. د افغانستان کرکټ بورد اعلان کړی چې افغان لوبډله به په راتلونکو سیالیو کې هم هڅه وکړي، چې لا نور بریاوې خپلې کړي او د کرکټ نړۍ ته خپله وړتیا وښيي.
