د روسیې د امنیت شورا منشي سرګي شویګو او د قزاقستان ولسمشر قاسم جومارت توقایف د سیمهییزو او نړیوالو مهمو مسایلو تر څنګ د افغانستان پر موضوع خبرې کړي دي. دا ناسته د دواړو هېوادونو ترمنځ د ستراتیژیکو همکاریو د دوام په لړ کې ترسره شوه.
د تاس خبري آژانس د راپور له مخې، دواړو لورو د دوهاړخیزو اړیکو د پراخولو، په ځانګړي ډول د امنیتي او نظامي همکاریو په برخه کې خبرې اترې کړي دي. هغوی همداراز د نړیوال او سیمهییز امنیت پر وړاندې د روانو ګواښونو، په ځانګړي ډول د مرکزي آسیا د وضعیت په اړه هم غږیدلي دي.
په دې لیدنه کې د افغانستان موضوع د اجنډا مهمه برخه وه، ځکه چې د دغه هېواد وضعیت لا هم د سیمې پر امنیت ژور اغېز لري. روسیې او قزاقستان، چې د مرکزي آسیا مهم لوبغاړي دي، د تروریزم، مخدره موادو قاچاق، او د افغانستان له بېثباتۍ سره د مبارزې لپاره پر ګډو همکاریو ټینګار وکړ.
دا ناسته داسې مهال ترسره شوه چې قزاقستان او روسیه د سیاسي، اقتصادي او امنیتي اړیکو د لا پراخولو هڅه کوي او غواړي د سیمهییزو ننګونو پر وړاندې ګډ دریځ ولري.
