د امریکا د دفاع وزیر، پیت هګست، اعلان کړی چې له افغانستان څخه د امریکا د وتلو بهیر به وڅېړي، ترڅو معلومه شي چې کومې تېروتنې شوې او ولې تر اوسه هېڅوک ځواب ویونکی نه دی.
د فاکسنیوز د راپور له مخې، هګست دا موضوع د پنټاګون له کارکوونکو سره په لیدنه کې یاده کړې او ټینګار یې کړی چې د ده هدف «غچ اخیستل» نه دي، بلکې غواړي معلومه کړي چې په رښتیا کومې ستونزې لامل شوې چې امریکا له افغانستان څخه په بېړني ډول را ووځي.
هغه ویلي: «موږ باید پوه شو چې دا بهیر ولې ناسم پرمخ ولاړ او ولې د دې لپاره هېڅ ډول رونټیا او ځواب نه وو.» هګست په اندېښنې سره ویلي چې له افغانستان څخه د وتلو ناسم بهیر، د دې لامل شوی چې په نړۍ کې د امریکا یو کمزوری تصویر وړاندې شي.
دا په داسې حال کې ده چې ډونالډ ټرمپ تر دې مخکې په ځلونو له افغانستان څخه د وتلو د ناسم مدیریت په برخه کې له جو بایډن سخت انتقاد کړی دی.
