په افغانستان کې د ملګرو ملتونو د استازولۍ دفتر (یونما) تایید کړ چې په کابل کې د دې سازمان په دفتر کې د ډزو په یوه پېښه کې یو کس وژل شوی او یو بل ټپي شوی دی.
د دفتر له خوا خپور شوی بیان ښیي چې د طالبانو امنیتي ځواکونو په دې پېښه کې برخه اخیستې، او د پېښې د لامل او جزئیاتو لپاره تحقیقات روان دي.
د طالبانو د کورنیو چارو وزارت ویاند عبدالمتین قانع هم په کابل کې د ملګرو ملتونو د استازولۍ په دفتر کې د ډزو پېښه تایید کړې او ویلي یې دي چې په دې پېښه کې یو طالب سرتېری وژل شوی او یو د ملګرو ملتونو یو کارمند «په سطحي ډول» زخمي شوی دی. ښاغلي قانع زیاته کړې چې د پېښې په اړه نورې څیړنې روانې دي.
