چین په بریالیتوب سره هغه پرمختللی جنګي جټ الوتکه ازمايښت کړې چې د مصنوعي هوښ پر ټکنالوژۍ مجهز دی. د ساوت چاینا مورنینګ پُسټ د راپور له مخې، دا جنګي جټ کولای شي تر غږ څلور برابره زیات سرعت ولري او په بشپړ ډول په چین کې دننه جوړ او طراحي شوی دی.
د خپرو شوو معلوماتو پر بنسټ، دغه ازموینه د چین په سویلي لویدیځ کې د تایهانګ ملي لابراتوار کې ترسره شوې، چې د چین د پوځي ټکنالوژۍ او پرمختللې هوايي دفاعي سیسټمونو د پراخ پرمختګ ښکارندويي کوي.
چین دغه پروژه د خپلو دفاعي تجهیزاتو د غښتلي کولو د ستراتیژۍ یوه برخه بللې او موخه یې د SR-71 Blackbird امریکایي الوتکې څخه د چټک جنګي جټ جوړول ښوولې ده. SR-71 د نظامي هوايي الوتنو په تاریخ کې له چټکو استخباراتي الوتکو څخه ګڼل کېږي، چې د سړې جګړې پر مهال د امریکا لهخوا ډیزاین شوې وه.
پوځي کارپوهان باور لري چې د مصنوعي هوښ د ټکنالوژۍ ادغام به د راتلونکو نسلونو جنګي جټونو وړتیاوې د پام وړ لوړ کړي. چین په دې برخه کې په وروستیو کلونو کې پراخې پانګونې کړې او دا پرمختګ کولای شي په نړیوالو تسلیحاتي سیالیو کې د دې هېواد موقعیت لا پیاوړی کړي.
