تازه په ټولنیزو رسنیو کې یو محرم استخباراتي سند خپور شوی، چې د طالبانو په حکومتي اداروکې د پاکستان استخباراتي اداره (آیاسآی) پراخ نفوذ په ډاګه کوي. دا مکتوب د طالبانو د استخباراتو د ۳۷۶ ریاست لخوا د وري میاشتې په لومړۍ نېټه، شاوخوا یوه اوونۍ مخکې، صادر شوی دی.
د دې استخباراتي سند له مخې، د آیاسآی نفوذي کسان د طالبانو په دولتي ادارو کې شتون لري، خو د پرمختللو وسلو د کموالي له امله تر اوسه د «مرموز وژنو» په ترسره کولو کې پاتې راغلي دي. دا سند زیاتوي چې د پاکستان استخباراتي اداره اوس هڅه کوي، چې د همدغو نفوذي کسانو له لارې خپلې اړینې وسلې په قاچاقي بڼه افغانستان ته انتقال کړي.
د طالبانو د استخباراتو ۳۷۶ ریاست په دې مکتوب کې خپلو اړوندو ادارو ته خبرداری ورکړی، چې د دې «امنیتي تشې» د مخنیوي لپاره باید بیړني اقدامات وکړي. دا سند ظاهراً د ۳۷۶ ریاست رئیس داکتر بشیر، لخوا لاسلیک شوی او طالبانو تر اوسه په رسمي ډول نه تائید او نه هم رد کړې ده.
د افغانستان د ملي امنیت پخواني رئیس، رحمت الله نبیل دا مکتوب په اکس (پخواني ټویټر) کې خپور کړی او ویلي یې دي، چې دا سند د طالبانو په حکومت کې د آیاسآی د نفوذ رسمي تأیید دی.
