یو شمېر افغان کډوال د پاکستان لومړي وزیر شهباز شریف ته پرانیستی لیک استولی او له نوموړي یې غوښتنه کړې چې افغانستان ته د کډوالو د شړلو په پرېکړې له سره غور وکړي.
د پاکستاني رسنیو د راپورونو له مخې، یو شمېر افغان کډوالو ته د امریکا سفارت لخوا ورکړل شوي اسنادونه د ۲۰۲۵ کال د مارچ ۳۱ مې نېټې څخه وروسته نور اعتبار نه لري. دا وضعیت د هغو کډوالو لپاره اندیښنې رامنځته کړې چې ډیری یې امریکا ته د لېږدولو په وروستي پړاو کې دي.
په دغه پرانیستي لیک کې دا ټینګار شوی چې د دې کډوالو بیرته افغانستان ته ستنیدل کولای شي امنیتي ګواښونو پیدا کړي. د پاکستان حکومت بیا استدلال کوي چې د شړلو تګلاره د ټولو غیر قانوني کډوالو لپاره ده او هېڅوک په کې استثنا نه دي.
یو بل له اساسي ننګونو څخه چې کډوال ورسره مخ دي، د ویزو د تمدید لوړ لګښتونه او د اداري کړنلارې ځنډونه دي. د لیک لاسلیک کوونکي غواړي چې د تمدید لګښتونه کم شي او هغو کسانو لپاره چې د لېږد لپاره انتظار کوي، معافیتونه جوړ شي.
د دغه پرانیستي لیک مسوولینو ټینګار کړی چې د افغان کډوالو شړل د پاکستان د نړیوالو مسوولیتونو خلاف دی. دوی خبرداری ورکړی چې دا پریکړه کولی شي د پاکستان او لویدیځو هیوادونو، په ځانګړې توګه امریکا، ترمنځ اړیکې کمزوري کړي او د پاکستان نړیوال تصویر زیانمن کړي.
ډېری پخواني ژباړونکي، خبريالان، ښځینه فعالانې او د امریکا او ناټو نور سیمه ييز همکاران په پاکستان کې مېشت دي او امریکا ته د تګ لپاره د انتظار شېبې تېروي. دغه کسان ادعا کوي چې په دې وروستیو کې له افغانستان څخه په تښتیدو مجبور شوي او تر اوسه پورې په پاکستان کې له یو بې برخلیک حالت سره ژوند کوي.
