د ترکیې ولسمشر رجب طیب اردوغان خبرداری ورکړی چې د استانبول د ښاروال اکرم اماماوغلو د نیولو په غبرګون کې پراخې مظاهرې «تاوتریخوالي ته اوښتې دي.» دا په داسې حال کې ده چې د حکومت مخالف ګوندونه، په ځانګړي ډول د جمهوریتپال ګوند، ټینګار کوي چې مظاهرې سولهییز دي او دوام به ومومي.
د اردوغان حکومت د لاریونونو پر ضد هر ډول بندیز اعلان کړی، خو مظاهرې او لاریونونه د شپږمې شپې لپاره د ترکیې په بېلابېلو ښارونو کې روانې دي. راپورونه ښيي چې په ځینو سیمو کې د مظاهرهچیانو او امنیتي ځواکونو ترمنځ نښتې شوې دي.
د جمهوریتپال ګوند مشر اوزګور اوزال، چې ګوند یې په راتلونکو ټاکنو کې د اردوغان اصلي سیال ګڼل کېږي، د دې پېښو په غبرګون کې له خلکو وغوښتل چې خپل اعتراض ته دوام ورکړي. هغه حکومت د «دیموکراتیکو ازادیو د ځپلو» په هڅه تورن کړ او خبرداری یې ورکړ چې د اماماوغلو نیول «د سیاسي کړکیچ د نوي پړاو پیل» دی.
رجب طیب اردوغان، چې د وزیرانو د شورا له غونډې وروسته یې په انقره کې وینا کوله، جمهوریتپال ګوند یې د عامه شتمنیو د هر ډول زیان او احتمالي شخړو مسئول وباله. هغه ټینګار وکړ چې یاد ګوند باید د خلکو له «پارولو» لاس واخلي، او خبرداری یې ورکړ چې حکومت به هېڅکله اجازه ورنه کړي چې «د هېواد ثبات» له خطر سره مخ شي.
