د طالبانو یو ویاند په افغانستان کې د امنیت په برخه کې د ایران د بهرنیو چارو وزیر، عباس عراقچي، له څرګندونو هرکلی کړی دی. عراقچي تر دې وړاندې ویلي وو چې په افغانستان کې داسې یوه ډله واک ته رسېدلې چې په ټول «هېواد کې یې امنیت ټینګ کړی دی.»
دا په داسې حال کې ده چې نړیواله ټولنه لا هم په افغانستان کې د امنیت په برخه کې شدیدې اندېښنې لري. داعش ډله د طالبانو د و اکمنۍ پر وړاندې تر ټولو جدي ګواښ ګڼل کیږي. دغې ډلې په تېرو درېو کلونو کې د طالبانو پر ضد خونړۍ بریدونه ترسره کړي او توانېدلي چې ان د طالبانو د وزارت او ولایت تر کچې مشران په نښه کړي.
د حقاني شبکې مهم غړی او د طالبانو د کډوالو وزیر خلیل الرحمان حقاني او په بلخ کې د طالبانو والي محمد داوود مزمل د داعش ډلې په پیچلي ځان وژونکو بریدونو کې وژل شوي دي.
همداراز د ۲۰۲۱ په نوامبر کې د سردار محمد داود خان پر پوځي روغتون د داعش بريد کې د طالبانو د کابل مرکزي قول اردو قومندان حمدالله نورزی چې په مخلص مشهور و، ووژل شو.
مخلص د طالبانو لومړی لوړ پوړی پوځي چارواکی و چې د پلازمېنې کابل د سقوط په ورځ د افغانستان ولسمشرۍ ماڼۍ ته ننوت او د ولسمشر پر څوکۍ سمبوليک عکس يې پر خواله رسنيو په پراخه کچه خپور او له دې سره د دغې ډلې په يوه مشهوره څېره بدل شو.
له دې سربېره داعش ډلې د طالبانو پر څارنوالۍ برید کړی او لسګونه نور اهداف یې په نښه کړي دي. دغه ډله په افغانستان کې پر هزاره توکمو او مذهبي اقلیتونو هم پر خپلو بریدونو کې بریالۍ وه او په تېرو دریو کلونو کې د طالبانو څو مذهبي مبلغین یې هم په نښه کړي دي.
امریکا او ملګري ملتونه تل ویلي چې داعش ډله په تېرو کلونو کې په افغانستان کې ځواکمنه شوې او پر وړاندې یې چټګ غبرګون ته اړتیا ده؛ خو طالبانو بیا په ځلونو د داعش له حضور او عملیاتي قوت انکار کړی دی.
