په داسې حال کې چې پرون د نړۍ په بېلابېلو هېوادونو کې د خبریالانو ملي ورځ ولمانځل شوه، خو په افغانستان کې د مطبوعاتو وضعیت له سختو محدودیتونو سره مخ دی. له هغه وخت راهیسې چې طالبان پر افغانستان واکمن شوي، خبریالان له سیستماتیکو فشارونو، خپلسرو نیونو او سانسور سره مخ دي.
د وروستیو راپورونو له مخې، یوازې په ۱۴۰۳ لمریز کال کې د خبریالانو د حقونو د نقض پېښې ۲۴ سلنه زیاتې شوي. په دې موده کې ۱۷۲ پېښې ثبت شوي چې له مخې یې ۵۰ خبریالان نیول شوي، ۲۲ رسنۍ تړل شوي، او لس خبریالان لا هم د طالبانو په بند کې دي.
طالبانو د «امر بالمعروف» تر نوم لاندې د رسنیو پر فعالیت سخت محدودیتونه لګولي. د انتقادي راپورونو خپرول بند شوي، خبریالان د خپل کار لپاره د طالبانو رسمي تأیید ته اړتیا لري، او د رسنیو پر محتوا سخت سانسور اعمالېږي.
په ورته وخت کې، ډېری خبریالان اړ شوي چې له هېواده ووځي، خو د ویزې محدودیتونه او مالي ستونزې د دوی راتلونکی له سختو اندېښننو سره مخ کړی. ډېری رسنیز کارپوهان په دې باور دي چې که نړیواله ټولنه د بیان آزادی په پرخه کې عملي اقدامات ونهکړي، د افغانستان خپلواکې رسنۍ به په بشپړ ډول له منځه ولاړې شي.
