نبیل په خپل ایکس پاڼه کې دا پوښتنه هم مطرح کړې چې پر بلوڅو د پاکستان د نظامي ځواکونو ظلم او پر افغانانو د دغو نظامي ځواکونو د نیابتي ډلې چې اشاره یې «طالبانو» ته ده، ظلم کول، څه فرق لري؟ نبیل وايي، که د بلوڅ وسله وال مبارزې د پاکستان د حکومت پر وړاندې تروریزم وګڼل شي، نو بیا کوم منطق شتون لري چې «مقاومت جبهه» خپلې مبارزې مشروع وګڼي؟
نبیل په دې باور دی چې د یوه قاطع او دفاع وړ دریځ درلودلو لپاره، ټول سیاسي جریانونه باید د دغو شخړو تاریخي او ټولنیز بنسټونو ته توجه وکړي او له دوه ګوني سیاست څخه ډډه وکړي. هغه خبرداری ورکوي چې له پاکستان سره هر ډول همغږي، پرته له دې چې دغه هېواد د افغانستان په وړاندې خپلې تېروتنې ومني او له افغان ملت څخه رسمي معذرت وغواړي، کولی شي افغانستان بیا له یو بل ګواښ سره مخ کړي.
رحمت الله نبیل د افغانستان د ملي امنيت پخوانی رئیس دی او اوس مهال د «حراست او ثبات افغانستان» جریان رهبري کوي. دغه جریان د طالبانو پر ضد یو سیاسي-نظامي ائتلاف دی چې د جمهوري دولت تر سقوط وروسته په ۲۰۲۱ کال کې جوړ شو. «حراست او ثبات افغانستان» له طالبانو سره پر مبارزې او د یو دموکراتیک نظام پر جوړولو ټينګار کوي.
