د پاکستان هوايي بریدونه او د طالبانو غبرګون نن سبا د پاکستان او طالبانو د چارواکو ترمنځ په یوه ګرمه موضوع بدله شوې ده. د طالبانو د بهرنیو چارو وزارت مرستیال عباس ستانکزي د افغانستان لپاره د پاکستان د پخواني استازي، آصف دراني، د څرګندونو په ځواب کې ګواښ کړی: «هر څوک چې زموږ خاورې ته په بده سترګه کتلي یا یې د تېري نیت کړی، سخت ځواب یې اخیستی دی.» ستانکزي زیاته کړې: «موږ د هغو کسانو سترګې له زیاتې غصې سره را ایستلې دي چې موږ ته یې په بدو سترګو کتلي دي.»
دغه څرګندونې چې په ټولنیزه شبکه "ایکس" کې خپرې شوې، پراخه غبرګونونه یې راپارولي او خلکو پرې بېلابېلې تبصرې کړي دي. آصف دراني د دې څرګندونو په ځواب کې، ستانکزي ته بلنه ورکړې چې د اعتدال سیاست مخ ته یوسي او ټینګار یې کړی: « له افراطي او تاوتریخوالي ډکې کړنې د ثبات پر ځای یوازې د تاوتریخوالي د دوام لامل ګرځي.» دراني وویل: «ښه به دا وي چې راتلونکو نسلونو ته د ژوند چل ور زده کړو، نه د مرګ.»
دغه لفظي شخړه د پاکستان لخوا د پکتیکا پر برمل ولسوالۍ له هوايي بریدونو وروسته د دواړو هېوادونو ترمنځ د زیاتېدونکي کړکېچ ښکارندویي کوي. دا په داسې حال کې ده چې اسلامآباد پر طالبانو تور پورې کوي چې د TTP ملاتړ کوي؛ خو طالبانو دا تورونه رد کړي او تل یې ویلي چې ټي ټي پي د پاکستان کورنۍ ستونزه ده او په افغانستان پورې هېڅ تړاو نه لري.
