کابل - طرزپرس: د افغانستان کرکټ بورډ د یو نیم میلیون افغانیو په لګښت د بدخشان ولایت مرکز فیضآباد ښار کې د کرکټ اکاډمۍ د جوړولو پروژه پیل کړه.
دا پروژه چې په ۲.۵ جریبه ځمکه کې جوړیږي، د کرکټ بورډ د پرمختیايي پلانونو یوه برخه ده چې موخه یې په شمال او شمالختیځ سیمو کې د ورزشي زیربناوو پیاوړي کول دي. د کرکټ بورډ د انجینرۍ څانګې مسؤل، ممتاز عمرزي، د دې پروژې د پرانیستې په مراسمو کې وویل: «په دې اکاډمۍ کې به د فلزي ستنو، د لوبغاړو لپاره د دوش او روزنې د اوبو رسولو بشپړ سیستم شامل وي. همدارنګه په راتلونکي کال کې به د اداري ودانۍ، د جامو بدلولو خونو، او مجهزو حمامونو جوړولو چارې هم ترسره شي.»
د کرکټ بورډ ځانګړي استازي، رحمتالله، په دې مراسمو کې زیاته کړه چې دغه اداره د بدخشان په ګډون په شمال او شمالختیځ ولایتونو کې د لوبغالو جوړولو چارې پر مخ وړي ترڅو مسلکي لوبغاړي وروزي. هغه ټینګار وکړ: «د کرکټ بورډ مشرتابه پلان لري چې په بدخشان کې یو معیاري لوبغالی جوړ کړي چې په یوه وخت کې د ۲۰۰ څخه تر ۵۰۰ لوبغاړو د تمرین کوربه توب وکړای شي.»
د دې پروژې پیل د بدخشان د ورزشي زیربناوو د پیاوړتیا په لور یو مهم ګام ګڼل کیږي. د دې اکاډمۍ په بشپړیدو سره به ځایي لوبغاړي غوره امکانات او مناسب چاپېریال ولري ترڅو خپلې وړتیاوې لا پسې غښتلي کړي.
