کابل- «طرز پرس» : د طالبانو مشر ملا هیبت الله خپله کابینه د یوې اختصاصي غونډې لپاره کندهار ته ورغوښتې. د غونډې اجنډا لا روښانه نه ده خو یو شمېر سرچینې وايي چې ښايي دا غونډه په افغانستان کې وروستیو سیاسي او اقتصادي مسایلو ته د کتنې لپاره متمرکزه وي.
یوې سرچینې د سې شنبې په ورځ د لړم ۱۵مه، طرز پرس ته ومنله، چې په دې غونډه کې د ملاهیبت الله له لوري د ښځو او پر رسنیو د لا ډېرو محدودیتونو په برخه کې د هغو سختو فرمانونو د تطبیق لپاره به هم سپاښتنې وشي، چې تردې مخکې یې ډېر غبرګونونه را پارولي وو.
خو دا په داسې حال کې ده چې د طالبانو یو شمېر چارواکي د ملا هیبت الله له دغو سختو قوانینو سره مخالف او ناراضه دي؛ خو ظاهراً څه نه وايي. تر دې مخکې نیویارک ټایمز راپور ورکړی وو چې د طالبانو د کورنیو چارو وزیر او په دغه ډله کې نفوذ لرونکی د حقانې شبکې مشر سراج الدین حقاني د ملا هیبت الله له دغو سخت دریځو فرمانونو سره سخت مخالف دی.
تر دغه راپور وروسته، افغانستان لپاره د امریکا پخوانی ځانګړي استازي زلمي خلیلزاد وویل چې د قندهار په حلقه کې د طالبانو د رييس الوزرا اقتصادي مرستیال ملابرادر او د دفاع وزیر ملایعقوب هم هغه کسان دي چې د ملا هیبت الله له دغو فرمانونو سره مخالف دي او لېواله دي چې له نړۍ سره تعامل وکړي.
د ښځو او رسنیو په برخه کې د طالبانو د مشر ملاهیبت الله وروستیو سختو فرمانونو د نړۍ په کچه غبرګونونه را پارولي دي او د نړۍ تر شلو ډېرو هېوادونو تازه پرېکړه کړې چې په دې اړه خپل شکایت به نړیوالې محکمې «لاهې» ته وسپاري.
