بلوڅ ازاديغوښتونکی غورځنګ ادعا کوي چې د پاکستان حکومت د دوی ۴۸ ساعته ضربالاجل ته پام ونه کړ او دغه غورځنګ په غبرګون کې ۲۱۴ پاکستاني پوځیان وژلي دي.
د بلوڅ بېلتون پال ډلې لخوا په تازه خپرې شوې اعلامیه کې ويل شوي چې د پاکستان حکومت د خپلو سرتېرو د ژغورلو پر ځای، هغوی د جګړې د سونتوکي په توګه کارولي دي. په اعلامیه کې راغلي: «پاکستاني حکومت د خپلو ځواکونو ژوند ته ارزښت نه ورکوي، بلکې هغوی په جګړه کې د سون توکي په توګه قرباني کوي. اوس دښمن [ د پاکستان حکومت] مجبور شو د خپلې سرتمبګۍ تاوان د ۲۱۴ کسانو په تلف کېدو ورکړي.»
دې غورځنګ همداراز ادعا کړې چې د پاکستان ځانګړو ځواکونو ته یې هم «درانه تلفات» اړولي. د اعلامیې له مخې، «هغه کسان چې پاکستان د خلاصون دعوه کوي، په حقیقت کې د جګړې د قوانینو له مخې، د غورځنګ له خوا ازاد شوي وو.»
بلوڅ ازاديغوښتونکی غورځنګ وایي، د دره بلان د یرغمل نیونې پېښه لا هم پای ته نه ده رسېدلې، او جزئیات به یې وروسته له رسنیو سره شریک کړي.
د پاکستان پوځ بیا مخکې ویلي و چې دا پېښه ختمه شوې، خو تر اوسه یې د دې غورځنګ وروستي ادعاوو ته غبرګون نه دی ښودلی. همداراز، پاکستاني چارواکي ادعا کوي چې بریدګر د افغانستان دننه له خپلو کسانو سره په تماس کې وو، خو طالبانو دا خبره رد کړې.
