د افغانستان د تېرې دورې ولسواک نظام مشر محمد اشرف غني د کرکټ نړیوال جام په سیالیو کې د افغان لوبډلې له بریا وروسته، یو پیغام خپور کړی، چې په کې دا بریا د افغانانو لپاره د هیلو او زغم نښه بلل شوې ده. نوموړي په ځانګړي ډول د انګلستان پر وړاندې د افغانستان د تاریخي بریا یادونه کړې او دا یې د ملي لوبډلې د ټینګې ارادې، ژمنتیا او هیلې پایله ګڼلې.
که څه هم د کرکټ سیالیو ته عموماً د سپورتي سیالیو په سترګه کتل کېږي، خو د اشرف غني دا پیغام یو مهم سیاسي پیغام هم له ځانه سره لري. د افغانستان اوسنی سیاسي وضعیت، نړیوال انزوا او د طالبانو رژیم تر سیوري لاندې د افغانانو محدودې نړیوالې بریاوې، کرکټ ته یوازې د یوه لوبیز فعالیت حیثیت نه ورکوي، بلکې دا د یو ملت د پیوستون، نړیوال هویت او مقاومت سمبول ګرځېدلی دی.
په ورته وخت کې، د اشرف غني له لوري دا پیغام د طالبانو په واکمنۍ کې د افغانستان د ملي هویت د خوندیتوب لپاره یوه هڅه ارزول کېدای شي. هغه هڅه کړې، چې د افغانانو له ملي احساساتو سره وصل شي او دا بریا د ملت د زغم، مقاومت او هیلې یوه نښه وښيي.
په نړیوال سیاست کې، سپورتي بریاوې ډېر وخت د یوه هېواد لپاره د نرمه قوې (Soft Power) په توګه کارېږي. د افغانستان په اوسني وضعیت کې، کرکټ یوازینی ډګر دی چې د هېواد نوم یې لا هم په نړیواله کچه ژوندی ساتلی دی. د اشرف غني له لوري دا پیغام، که څه هم ظاهراً یوازې د لوبغاړو لپاره د مبارکۍ یو پیغام دی، خو د طالبانو د اوسني رژیم پر وړاندې، د یو ډول سیاسي حضور نښه هم ګڼل کېدای شي. ښاغلي غني له دې پیغام سره هڅه کړې چې نړیوالو ته هم د خپل حضور یو څرګند پیغام ابلاغ کړي او همداراز په غیر مستقیمه ژبه ووايي چې دی به په راتلونکو سیاسي معادلو کې یو مهم لوبغاړی وي.
د تېرې دورې د ولسواک نظام د مشر دا پیغام په داسې شرايطو کې خپريږي چې د طالبانو په ۳ کلنه واکمنۍ کې، افغانستان ورځ تربلې د نړیوال انزوا پر لور روان دی او راتلونکي لپاره هم هېڅ روښانه لړلید نه تر سترګو کیږي.
