ځايي سرچینو طرز پرس ته تایید کړې ده چې په دایکنډي کې د نامعلومو وسله والو کسانو په برید کې، ۱۴ کسان وژل شوي او څلور نور ټپیان دي.
طرز پرس: دا خونړۍ برید نن پنجشنبه، د وږي ۲۲مه، د غرمې شاوخوا یوه بجه د دایکنډي او غور ولایتونو ترمنځ د «قریو دال» په کوټل سیمه کې ترسره شوی دی. سرچینو طرز پرس ته ویلي چې بریدګر څلور کسان وو، چې لومړی یې د یوه فلانکوچ موټر سپرلۍ راښکته کړې او د دوی هویت له معلومولو وروسته یې په ډزو وژلي دي.
سرچینې وایي، قربانیان د دایکنډي ولایت د سنگتخت او بندر ولسوالۍ د «جوی سردار» او «قریو دال» کلیو اوسېدونکي وو چې ټول د کربلا د زیارت کوونکو د هرکلي لپاره دې سیمې ته تللي وو. د طرز پرس د سرچینو په حواله، په دې پېښه کې ۱۴ کسان وژل شوي او ۴ نور ټپیان دي، چې د ټپیانو حالت هم د اندېښنې وړ ښودل شوی دی.
تر اوسه پورې څوک یا کومې وسله والې ډلې د دې برید مسئولیت په غاړه نه دی اخیستی او طالبانو هم په دې اړه څه نه دي ویلي.
