د کرملین ویاند، دیمیتري پسکوف، په خپلو تازه څرګندونو کې وویل چې مسکو او واشنګټن د خپلو وروستیو مذاکراتو پایلې په ریاض کې ترلاسه کړي دي او اوس د دې راپورونو شننه کوي. پسکوف د سه شنبې په ورځ، د وري ۵ مه نېټه، خبریالانو ته وویل چې تر اوسه پورې د روسیې او امریکا د ولسمشرانو ترمنځ د خبرو لپاره هیڅ بله نېټه په پام کې نه ده نېول شوې.
هغه زیاته کړه: «موږ د تخنیکي خبرو اترو په اړه خبرې کوو چې له کره جزئیاتو سره سر و کار لري. نو، د دې مذاکراتو محتوا به هېڅکله خپره نه شي او هیڅ څوک باید د دې تمه ونه لري.»
د کرملین ویاند زیاتوي: «بیا هم ټینګار کوم چې دواړه لوري اوس مهال د ترلاسه شویو راپورونو په تحلیل بوخت دي. یوازې وروسته له دې مرحلې څخه کولی شو چې د ځینو تفاهماتو په اړه خبرې وکړو.»
د اوکراین جګړې پای ته رسولو لپاره د واشنګټن او مسکو ترمنځ خبرې د یک شنبې په ورځ په ریاض کې په یوه لوکس هوټل کې ترسره شوې. دا مذاکرات د تړلو دروازو ترشا ترسره شول او تر اوسه پورې هیڅ جزیات یې نه دي خپاره شوي.
