د امریکا حکومت له خوا پر هغه نوې طرحه کار روان دی، چې له مخې یې د ۴۳ هېوادونو پر اتباعو د ویزې بندیزونه لګول کېږي. د نیویارک ټایمز د راپور له مخې، دا طرحه هېوادونه په درېیو کټګوریو وېشي، چې افغانستان د سور لېست (مکمل منع شویو هېوادونو) په سر کې ځای لري.
د بندیزونو درې کټګورۍ:
- سور لېست: د افغانستان په ګډون، د ۱۱ هېوادونو لکه ایران، سوریه، سودان، شمالي کوریا، لیبیا او یمن پر اتباعو به د هر ډول ویزې پر اسانتیاوې بندیز ولګول شي. په دې بندیزونو کې کاري، تحصیلي او مهاجرتي ویزې هم شاملې دي.
- نارنجي لېست: ۱۰ هېوادونه، لکه پاکستان، روسیه او بلاروس، سخت محدودیتونه لري، یوازې شتمن پانګوال او نامتو تاجران د سختو امنیتي پوښتنو ګروېګونو وروسته د امریکا ویزه ترلاسه کولی شي.
- زېړ لېست: ۲۲ هېوادونو ته ۶۰ ورځې وخت ورکړل شوې، څو خپل امنیتي معلومات اصلاح کړي، که نه له سختو بندیزونو سره مخ کېدای شي.
که څه هم دا طرحه لا وروستۍ شوې نه ده، خو د کډوالو د چارو ملاتړ کوونکي بنسټونه یې «تعصبپرسته او ظالمانه» بولي، چې د دوی په وینا، د زرګونو پناه غوښتونکو راتلونکی اغېزمن کولی شي.
پر افغانستان هم د دې بندیزونو د پلي کېدو خبره داسې وخت مطرح شوې چې د امریکا خواخوږي او سیمه ييز زرګونه همکار افغانان لاهم د ویزې ترلاسه کولو لپاره هڅه کوي او دوی په یو نامعلوم وضعیت کې ژوند کوي.
