د روسیې ولسمشر ولادیمیر پوتین اعلان وکړ چې هېواد یې چمتو دی له اوکراین سره لنډمهاله اوربند ته غاړه کښېږدي، خو ټینګار یې وکړ چې دغه هوکړه باید د روسیې د شرایطو په پام کې نیولو سره وشي.
پوتین د بلاروس له ولسمشر الکساندر لوکاشینکو سره په یوه ګډ خبري کنفرانس کې وویل: «موږ د اوربند منلو ته چمتو یو، خو دا هوکړه باید دایمي او عادلانه سولې ته لاره هواره کړي.»
هغه زیاته کړه، تر هغه چې د جګړې «اصلي عوامل» حل نه شي، هر ډول اوربند به یوازې د جګړې یو لنډمهاله درېدل وي. مسکو په ځلونو ویلي چې د جګړې د پای ته رسولو لپاره، اوکراین باید ضمانت وکړي چې ناټو ته به نهورګډېږي او روسیه به د اشغال شویو سیمو کنټرول وساتي. کرملین ټینګار کړی چې له دې شرایطو پرته له کیف سره هېڅ توافق ممکن نهدی.
بل پلو اوکراین او د هغه لویدیځ متحدینو تر اوسه د روسیې ورته وړاندیزونه رد کړي او ټینګار یې کړی چې روسي ځواکونه باید له اشغال شویو سیمو ووځي. د روسیې چارواکو مخکې خبرداری ورکړی و چې اوکراين ښايي له موقت اوربند څخه د خپلو ځواکونو د پیاوړتیا او انسجام لپاره ګټه پورته کړي.
