د روسیې دولت په امریکا او اروپایي هېوادونو ګوته ونېوه چې پر دغه هېواد د بريد لپاره اکراین يې هڅولی او خبرداری یې ورکړ چې له اوکراین څخه توغنديز ملاتړ له «اور سره د لوبې» په معنا ده.
طرزپرس: د روسیې د بهرنیو چارو وزیر سرګي لاوروف د وږي په ۶مه، په یوه بیان کې د درېیمې نړیوالې جګړې له پیل خبرداری ورکړ او په غیر مستقیم ډول یې امریکا ته وویل چې درېیمه نړیواله جګړه به یوازې په اروپا محدود نه وي. لاوروف په دې بیان کې زیاته کړه چې متحده ایالات په اکراین کې جګړه پراخوي او د جګړې د اوږدولو په هڅه کې ده. لاوروف په مسکو کې خبریالانو ته وویل: «د اور سره لوبې کول، لکه د وړو ماشومانو په څېر، د لویدیځو هېوادونو د مسوولو لویانو لپاره چې اټومي وسلې لري، ډېر خطرناک دي.»
د روسیې د بهرنیو چارو وزیر همدارنګه هغه څه ته چې د متحده ایالاتو لخوا محاسباتي تېروتنه بلل کېږي، اشاره وکړه او ویې ویل چې امریکایان باید داسې فکر ونه کړي چې «درېیم نړیواله جګړه، که خدای مه کړه، پېښ شي، یوازې به په اروپا اغیزه وکړي.» دا په داسې حال کې ده چې نن سهار د سې شنبې په ورځ اکراین د روسیې د یوه ځواکمن برید په وسیله ولړزېد او ولادیمیر زیلینسکي هم په خپل بیان کې پر هغه باور د تاييد خونړی مهر ولګاوه چې دی پرته له لویدیځو او اروپایي متحدینو څخه د روسیې پر وړاندې د اوکراین دفاع نشي کولی.
