د سپینې ماڼۍ ویاندې کارولین لیویت وايي چې د اسراییل حکومت پر غزې له خپلو بریدونو مخکې د امریکا له ولسمشر ډونالډ ټرمپ سره مشوره کړې وه. لیویت په یوه مرکې کې «فاکس نیوز» سره په خبروکې وویل: «اسراییلیانو د غزې پر وړاندې خپل بریدونو په اړه له سپینې ماڼۍ سره مشوره کړې وه.»
ولسمشر ټرمپ مخکې له دې حماس ته خبرداری ورکړی وو چې باید ټولې یرغمل شوي کسان خوشې کړي، او که دا کار ونهکړي، «د دوزخ دروازې به د دوی پر مخ پرانیزي.»
په ورته وخت کې د اسراییل پوځ ویلي چې په وروستیو ساعتونو کې یې د حماس نظامي مرکزونه او بنسټیز اهداف یې په نښه کړي دي. بل پلو د فلسطین د خپلواکو ادارې چارواکي له نړیوالې ټولنې او امریکا څخه غوښتي چې د اسراییلو بریدونه بند کړي.
پر غزې د اسراييل د بریدونو دویم پړاو، نړیوال غبرګونونه پارولي دي. د سعودي عربستان د بهرنیو چارو وزارت لخوا په خپره شوې خبرپاڼه کې، د دې برید کلکه غندنه شوې او له نړیوالې ټولنې غوښتنه شوې چې ژر تر ژره تشدد او وژنې ودرول شي.
د ملګرو ملتونو سرمنشي انتونیو ګوتیرش هم د غزې د اوربند توافق ته درناوی او د پاتې یرغمل شويو کسانو د خوشې کولو غوښتنه کړې ده. د اروپاي ټولنې کمسیون هم د غزې د کړکېچ د زیاتېدو د مخنیوي لپاره د بېړنیو اقداماتو غوښتنه کړې ده.
