چینایي موټر جوړونکي شرکت اکسپنګ اعلان کړی چې د دې شرکت نوی الوتونکی موټر، چې «ځمکنۍ بېړۍ» نومول شوی، په ۲۰۲۶ کال کې به بازار ته وړاندې شي. دغه موټر چې د اکسپنګ یوې بلې څانګې AeroHT لخوا ډیزاین او تولید شوی، یوه شپږ څوکۍ لرونکي موټر دی چې یوازې پنځه کسان لېږدولی شي.
اکسپنګ لا تر اوسه د دې موټر تخنیکي مشخصات په بشپړه توګه نه دي معرفي کړي، خو ویلي یې دي چې دغه موټر هیبرید انجن لري او له بشپړ چارج شوي بیټرۍ سره تر ۱۰۰۰ کیلومتره واټن وهلی شي. همداراز، که دا موټر بشپړ چارج ولري؛ نو شپږ پروازونه ترسره کولی شي.
د یاد شرکت په وینا، دغه موټر به د ۳۰۰ زرو ډالرو په حدودو کې بیه ولري. تر دې مهاله له ۳۰۰۰ زیاتو کسانو د دې الوتونکي موټر د اخیستلو لپاره نوم لیکنه کړې ده او دا څرګندوي چې ډېر خلک یې د اخېستو لېواله دي.
یاد شرکت خپلو پلویانو ته ویلي چې اوس تر ۲۰۲۶ کاله پورې انتظار وکړي؛ خو لا روښانه نه ده چې دا موټر څنګه په نړیوال بازار کې وړاندې کېږي او آیا کولی شي د پیرودونکو تمې او د امنیت معیارونه پوره کړي او کنه؟
