واتساپ اعلان کړی چې د دې اپلیکېشن لسګونه کاروونکي، په ځانګړي ډول خبریالان او مدني فعالان، د اسرائیل د یو استخباراتي شرکت «پاراگون سولوشنز» د سایبري حملو هدف ګرځېدلي دي.
د واتساپ د موندنو له مخې، دا سایبري بریدونه لږ تر لږه ۹۰ کاروونکي په ۲۴ هېوادونو کې هدف ګرځولي، چې ډېری یې خبریالان او د مدني ټولنې فعالان دي.
که څه هم واتساپ په دې اړه نور جزئیات نه دي ورکړي، خو د واتساپ یو لوړپوړي چارواکي د جمعې په ورځ رویټرز ته ویلي، چې دوی د دې بریدونو تر معلومولو وروسته پاراگون سولوشنز ته رسمي لیک استولی او د دې اقداماتو د درولو غوښتنه یې کړې ده.
واتساپ په خپله اعلامیه کې ټینګار کړی چې د کاروونکو امنیت او د هغوی د محرمیت ساتنه د دې شرکت لومړیتوب دی او د ورته ګواښونو پر وړاندې به خپل هڅې جاري وساتي. له بلې خوا، پاراگون سولوشنز تر اوسه په دې اړه هېڅ تبصره نه ده کړې.
پاراگون سولوشنز یو اسرائیلي شرکت دی چې د استخباراتي سافټویرونو په پراختیا کې فعالیت لري او خپلې پرمختللې ټېکنالوژۍ حکومتي مشتریانو ته وړاندې کوي. د دې شرکت جاسوسي سافټویرونه دومره پرمختللي دي چې کولی شي د موبایل کامره او مایکروفون له لرې واټنه فعاله کړي، معلومات غلا کړي، او حتی د واتساپ کاروونکي ته پرته له کوم خبرداري، نفوذ وکړي.
