د امریکا د متحده ایالاتو ولسمشر، ډونالډ ټرمپ، د روسیې ولسمشر ولادیمیر پوتین ته خبرداری ورکړی چې که د اوکراین «بېمعنی» جګړه پای ته ونه رسوي، روسیه باید لا سختو بندیزونو ته تیار شي.
ټرمپ په خپل ټولنیزه شبکه، تروت سوشال، کې لیکلي: «دا بې مانا جګړه ده. که روسیه په بیړني ډول دې جګړې ته د پای ټکی کېنږدي، نو زه به پرې لا سخت اقتصادي تعرفې ولګوم. دا جګړه نه د روسیې په ګټه ده، نه د اوکراین او نه هم د نړۍ.»
هغه زیاته کړه: «زما هڅه د دې بحران د حل لپاره، تر ټولو لویه مرسته ده چې زه یې روسیې او ولادیمیر پوتین ته کولی شم. خو که دا فرصت له لاسه ورکړل شي، نو روسیه به لا ډېر زیان وکړي.»
ټرمپ، چې مخکې ویلي و، کولی شي په ۲۴ ساعتونو کې دغې جګړې ته د پای ټکی کېږدي، یو ځل بیا یې له پوتین سره د خبرو کولو لپاره خپله چمتووالی اعلان کړی دی. هغه وویل د دې وړتیا لري چې دغه کړکېچ پای ته ورسوي. خو د ښاغلي ټرمپ په باور، اوس د روسیې د پرېکړې وخت دی: «یا د سولې لار به غوره کوي او یا به له سختو بندیزونو مخ کیږي.»
په همدې حال کې، ټرمپ د پوتین دریځ ته هم اشاره کړې او ویلي یې دي چې د اوکراین د خاورې قبضه به هېڅکله ونه منل شي. ټرمپ ټينګار وکړ چې اوکراین حق لري خپله خاوره وساتي او هغه به هم هېڅکله اجازه ور نه کړي چې د دې کړکېج لمنه پراخه شي. ټرمپ مخکې هم ویلي و چې په اوکراین کې د جګړې دوام به نه یوازې د روسیې لپاره سختې پایلې ولري، بلکې نړۍ به هم د لا ډېرو بېثباتیو سره مخ کړي.
