تازه خبرونه

د طالبانو د کورنیو چارو وزیر سراج الدین حقاني په دولتي اداروکې د پخواني حکومت کارکوونکو پر ګوښه کېدو اندېښنه څرګندوي او وايي چې نیمګړتیاوو ته ګوته نیول او د پخوانیو مامورینو ګوښه کول د طالبانو ضعف او کمزورتیا په ډاګه کوي.

د فرانسې ولسمشر امانوئل مکرون ومنله چې افغانې مېرمنې د امریکا د وتلو له پرېکړې تر ټولو ډېر زیانمنې شوې او هره ورځ دا لوړ قیمت پرې کوي.

د افغانستان پر وړاندې د نړیوالې ټولنې نسبتا سختو سیاستونو په پایله کې، داسې ښکاري چې طالبان هم له دې پروسې ستړي شوي او له نړیوالې ټولنې غواړي چې د افغانستان په وړاندې "مسؤولانه" چلند وکړي.

د امریکا د بهرنیو چارو وزارت له طالبانو سره د واشنګټن د مالي ملاتړ په اړه راپورونه رد کړل او دا تورونه یې په بشپړه توګه بې اساسه وبلل.

د امریکا د متحده ایالتونو یوه جګپوړې ډیپلوماټ د افغانستان په اړه د دوحې د څلورمې غونډې د جوړېدو خبر ورکړی دی. د طرز پرس د خبر له مخې، په افغانستان کې د امریکا د سفارت شارژدافیر کرن ډکر په قطر کې له خبریالانو سره په یوه مجازي ناسته کې وویل چې د دوحې د څلورمې ناستې پلان هم د ملګرو ملتونو په اجنډا کې دی.

د امریکا د متحده ایالتونو د ولسمشر جوبایډن مرستیالې کاملا هریس چې ټاکل شوې د امریکا په راتلونکو ټاکنوکې د جوبایډن پر ځای له ډونالډ ټرمپ سره ټاکنیزو سیالیو کې ګډون وکړي، وویل چې ټرامپ او ټرمپ په څېر خلک ښه پېژني.

د پاکستان د جمعیت علما ګوند مشر مولانا فضل الرحمان تازه ویلي چې طالبان غواړي د افغانستان په نصاب کې د دې لپاره بدلون راولي چې د پاکستان پر وړاندې د افغانانو منفي ذهنیت بدل کړي.

تر هغه وروسته چې د امریکا د متحده ایالتونو ولسمشر جوبایډن د ولسمشرۍ له ټاکنو څخه د وتلو پرېکړه اعلان کړه، د هغه سخت سیال ډونالډ ټرمپ د دې پرېکړې په غبرګون کې وویل، چې بایډن له پیل څخه دا وړتیا نه درلوده او باید نه وای نوماند شوی.

په کابل کې د روسیې سفیر دیمیتري ژیرنوف د روسیې له تاس خبري اژانس سره په ځانګړې مرکه کې ویلي چې مسکو په افغانستان کې د لا ډېرو قونسلګریو د پرانستلو احتمال نه ردوي.

د طرز پرس د راپور پر بنسټ، پښتون ژغورنې غورځنګ هم په یوه خبرپاڼه کې ویلي چې نن په بنو کې اعتراضي پرلت پیلوي. دا اقدام تر هغه وروسته کیږي چې پرون د جمعې په ورځ د جولای۱۹مه، د پاکستان پولیسو پر لاریونوالو نیغ په نیغ ډزې وکړې او لږترلږه ۵ کسان پکې ووژل شول او ۲۳ نور ټپيان شول.