له بغلان ولایت څخه سیمهییزو سرچینو تایید کړې چې د سې شنبې په ماښام «د مرغومي ۱۸مه»، دوه دیني عالمان له جومات څخه د وتلو او یوې میلمستیا ته د تګ پر مهال د برید ښکار شوي دي. په دې پېښه کې یو دیني عالم عبدالرزاق وژل شوی او بل دینی عالم حمدالله چې د مرکزي بغلان ولسوالۍ د جومات امام هم وو، سخت ټپي شوی دی.
داعش ډلې په یوه بیان کې د دې برید پړه منلې او ویلي یې دي چې دوی د طالبانو دوه غړي په نښه کړي دي. په دې بیان کې راغلي چې د برید په پایله کې یو کس وژل شوی او بل ټپي شوی دی.
له دې وړاندې طالبانو ویلي و چې پر دغو دیني عالمانو د شخصي دښمنۍ له کبله برید شوی دی. دا برید په داسې حال کې شوی چې د تلې میاشتې په پیل کې هم د نهرین ولسوالۍ د ښارکوټ په یوه تصوفي عبادتځای وسلهوال برید وشو او په پایله کې یې ۱۰ کسان ووژل شول. داعش ډلې د هغه برید مسئولیت هم پر غاړه اخیستی و.
